ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកទឹកចិត្តឱ្យក្រុមហ៊ុន ហុងដា ពិនិត្យលទ្ធភាពសហការជាមួយសហគ្រាសធុនតូច និងមធ្យម (SMEs) ក្នុងស្រុក ដើម្បីសិក្សាពីសក្តានុពលនៃការផលិតគ្រឿងបង្គុំមួយចំនួន ក្នុងចំណោមគ្រឿងបង្គុំជាង៥០០សម្រាប់ផលិតម៉ូតូហុងដាមួយគ្រឿង។ នេះបើតាមការចុះផ្សាយរបស់ក្រសួងឧស្សាហកម្ម នាថ្ងៃទី២៤ ខែមិថុនា ឆ្នាំ២០២៤។

ក្នុងដំណើរទស្សនកិច្ចនៅរោងចក្រផលិតម៉ូតូ ហុងដា នៅរាជធានីភ្នំពេញនេះ ឯកឧត្តម ហែម វណ្ណឌី បានជំរុញឱ្យក្រុមហ៊ុនបើកខ្សែច្រវាក់ផលិតកម្មរបស់ខ្លួនដល់សហគ្រាសធុនតូច និងមធ្យម បានមកសិក្សាស្វែងយល់ពីស្តង់ដារ និងវិន័យការងាររបស់ក្រុមហ៊ុនថែមទៀត។ ឯកឧត្តមរដ្ឋមន្ត្រីក្រសួងឧស្សាហកម្ម បានសរសើរដល់ក្រុមហ៊ុនចំពោះកិច្ចខិតខំប្រឹងប្រែងលើការផលិតក្នុងស្រុកជំនួសឱ្យការនាំចូល ដែលនេះបញ្ជាក់អំពីការគាំទ្ររបស់រាជរដ្ឋាភិបាលចំពោះកិច្ចខិតខំប្រឹងប្រែង។

បន្ថែមពីការលើកទឹកចិត្តខាងលើ ឯកឧត្តម ហែម វណ្ណឌី ក៏បានស្នើឱ្យក្រុមហ៊ុន ហុងដា ពិចារណាបើកឱកាសដល់វិចិត្រករខ្មែរ ក្នុងការរួមចំណែកដល់ការរចនាម៉ូត និងស្វែងរកជម្រើសផ្តល់ហិរញ្ញប្បទាន ដើម្បីពង្រីកលទ្ធភាពរបស់ប្រជាជនកម្ពុជាក្នុងការទិញម៉ូតូ ហុងដា និងបង្កើនភាពងាយស្រួលក្នុងការធ្វើដំណើរ។ ឯកឧត្តមរដ្ឋមន្ត្រីក្រសួងឧស្សាហកម្ម បានបន្តថា ម៉ូតូជាមធ្យោបាយធ្វើដំណើរដ៏សំខាន់សម្រាប់ជីវភាពរស់នៅប្រចាំថ្ងៃ និងសម្រាប់សេដ្ឋកិច្ចរបស់ប្រជាជនកម្ពុជា។

គួរជម្រាបថា រោងចក្រផលិតម៉ូតូ ហុងដា មានសមត្ថភាពផលិតម៉ូតូហុងដាឌ្រីមចំនួន ១ ៥០០គ្រឿងក្នុង រយៈពេល ៨ម៉ោង មកទល់នឹងពេលបច្ចុប្បន្ន ក្រុមហ៊ុន ហុងដា បានផលិតម៉ូតូជាង ៤,៣ លានគ្រឿង និងបានបង្កើតការងារជាង ២ ០០០កន្លែងក្នុងប្រទេសកម្ពុជា៕