ភ្នំពេញ៖ ឯកឧត្តមរដ្ឋមន្ត្រី ហែម វណ្ណឌី ប្រធានគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ ស្នើសុំការគាំទ្របន្ថែមពីក្រសួងមហាផ្ទៃ ដើម្បីជំរុញការយល់ដឹង និងការអនុវត្តយុទ្ធសាស្ត្រ ក្នុងចំណោមរដ្ឋបាលថ្នាក់ក្រោមជាតិ សម្រាប់សម្រួលឱ្យមានស្តង់ដាររួមនៃការស្នើសុំសេវាសាធារណៈ ពិសេសសម្រាប់អាជីវកម្មនៅក្នុងមូលដ្ឋាន តាមយន្តការច្រកចេញចូលតែមួយ ដូចមានចែងក្នុងយុទ្ធសាស្ត្រជាតិ។

ក្នុងជំនួបដើម្បីពិនិត្យវឌ្ឍនភាព និងកំណត់ជំហានបន្ទាប់ក្នុងការអនុវត្តយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធនេះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏បានស្នើឱ្យដាក់បញ្ចូលការងារអភិវឌ្ឍន៍សេដ្ឋកិច្ចក្រៅប្រព័ន្ធ ជាប្រធានបទពិភាក្សាមួយសម្រាប់សន្និបាទក្រសួងមហាផ្ទៃនាពេលខាងមុខផងដែរ។

ជាមួយគ្នានេះ ឯកឧត្តម ហែម វណ្ណឌី បានលើកឡើងថា កំណើននៃការចុះឈ្មោះអ្នកសេដ្ឋកិច្ចក្រៅប្រព័ន្ធ តាមថ្នាលឌីជីថល ដែលគិតត្រឹមថ្ងៃទី២៣ ខែឧសភា ឆ្នាំ២០២៥ មានសំណើចុះឈ្មោះសរុបចំនួន ៧២ ៩៩៨ ក្នុងនោះ ៨៨% បានចុះឈ្មោះតាមរយៈទូរសព្ទដៃ។ ឯកឧត្តម ហែម វណ្ណឌី បានឱ្យដឹងពីតួនាទីដ៏សំខាន់របស់ក្រសួងមហាផ្ទៃ និងរដ្ឋបាលថ្នាក់ក្រោមជាតិ ដោយបញ្ជាក់ថា អ្នកសេដ្ឋកិច្ចក្រៅប្រព័ន្ធភាគច្រើនស្ថិតនៅក្នុងមូលដ្ឋានដែលគ្រប់គ្រងដោយរដ្ឋបាលថ្នាក់ក្រោមជាតិផងដែរ។

ឯកឧត្តមអភិសន្តិបណ្ឌិត ស សុខា ក៏បានលើកឡើងថា ការិយាល័យច្រកចេញចូលតែមួយនៃរដ្ឋបាលថ្នាក់ក្រោមជាតិ បានបង្កើនការផ្តល់សេវាសាធារណៈរបស់ខ្លួនចំនួន ១២%ក្នុងឆ្នាំ២០២៤-២០២៥។ ឯកឧត្តម ស សុខា ក៏បានបង្ហាញគោលបំណងក្នុងការចែករំលែកទិន្នន័យពាក់ព័ន្ធ ដោយបន្ថែមថា ក្រសួងមហាផ្ទៃប្រហែលជា មានទិន្នន័យរដ្ឋបាលច្រើនជាងគេទូទាំងប្រទេស ដែលអាចបម្រើជាប្រយោជន៍សម្រាប់ការអភិវឌ្ឍជាតិ៕