ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បានដាក់ចេញនូវក្របខ័ណ្ឌនិម្មាបនកម្មប្រព័ន្ធបច្ចេកវិទ្យាព័ត៌មាន ដើម្បីធ្វើសុខដុមនីយកម្មប្រព័ន្ធបច្ចេកវិទ្យាព័ត៌មានក្នុងក្រសួងសេដ្ឋកិច្ច និងហិរញ្ញវត្ថុ លើទម្រង់ជាប្រព័ន្ធអេកូឡូស៊ីឌីជីថលបែបវិមជ្ឈការ ដែលសំដៅដល់ការធ្វើបរិវត្តកម្មឌីជីថល ប្រកបដោយប្រសិទ្ធភាព និងស័ក្តិសិទ្ធិភាព។

ជាមួយគ្នានេះ ក្រសួងសេដ្ឋកិច្ច បានដាក់ចេញនូវគោលដៅ កំណត់មុខងាររបស់អង្គភាពលើការគ្រប់គ្រងប្រព័ន្ធបច្ចេកវិទ្យាព័ត៌មាន, រៀបចំក្របខ័ណ្ឌអភិបាលកិច្ចទិន្នន័យ, រៀបចំក្របខ័ណ្ឌអន្តរប្រតិបត្តិការ, កំណត់សេចក្តីណែនាំជាស្តង់ដាសម្រាប់ការអភិវឌ្ឍ និងគ្រប់គ្រងប្រព័ន្ធបច្ចេកវិទ្យាព័ត៌មាន ដើម្បីជំរុញការប្រើប្រាស់បច្ចេកវិទ្យា និងធនធានរួម។

ទន្ទឹមនឹងនេះ ក្រសួងសេដ្ឋកិច្ច និងហិរញ្ញវត្ថុ ក៏កំពុងធ្វើទំនើបកម្មការងារ តាមរយៈការប្រើប្រាស់បច្ចេកវិទ្យាព័ត៌មាន ឬឌីជីថល សម្រាប់គាំទ្រ ជំរុញ និងពន្លឿនដល់ការអនុវត្តកម្មវិធីគោលនយោបាយរបស់ក្រសួង និងព្រមទាំងកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាលកម្ពុជា ដើម្បីធានាឱ្យបាននូវគណនេយ្យភាព តម្លាភាព ប្រសិទ្ធភាព និងស័ក្តិសិទ្ធិភាពផងដែរ។

ប្រភពពីសៀងភៅ៖ ក្របខ័ណ្ឌនិម្មាបនកម្មប្រព័ន្ធបច្ចេកវិទ្យាព័ត៌មានក្រសួងសេដ្ឋកិច្ច និងហិរញ្ញវត្ថុ