ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ ជំរុញកិច្ចសហប្រតិបត្តិការរយៈពេលវែងក្នុងការបណ្តុះបណ្តាលវិជ្ជាជីវៈរវាងគ្រឹះស្ថានអប់រំបណ្តុះបណ្តាល នៃប្រទេសអូស្រ្តាលី និងគ្រឹះស្ថានបណ្តុះបណ្តាលបច្ចេកទេស (TVET) របស់ប្រទេសកម្ពុជា ដើម្បីបណ្តុះបណ្តាលធនធានមនុស្សលើជំនាញបច្ចេកទេស ប្រកបដោយគុណភាព។

ក្នុងកិច្ចពិភាក្សាការងារ កាលពីថ្ងៃទី១៤ ខែមីនា ឆ្នាំ២០២៥ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បង្ហាញទំនុកចិត្តចំពោះស្តង់ដាអប់រំបណ្តុះបណ្តាលរបស់ប្រទេសអូស្ត្រាលីដែលនឹងរួមចំណែកបណ្តុះបណ្តាលជំនាញនានានៅកម្ពុជា ប្រកបដោយគុណភាព។ ទន្ទឹមនឹងនោះ ឯកឧត្តមរដ្ឋមន្រ្តី បានលើកឡើងពីកម្លាំងពលកម្មជំនាញ ដែលទីផ្សារការងារនៅក្នុងប្រទេសកម្ពុជា ត្រូវការ ដូចជាក្នុងវិស័យសេវាកម្ម កសិកម្ម និងវិស័យឧស្សាហកម្មជាដើម។

លោកស្រី ខារ៉ូលីន ប៊េកស្ទ័រ (Carolyn Bagster) លេខាទី១ និងជាប្រធានការិយាល័យពាណិជ្ជកម្ម និងវិនិយោគនៃស្ថានទូតអូស្ត្រាលីប្រចាំកម្ពុជា បានសង្ឃឹមថា តាមរយៈការជួយសម្របសម្រួលពីក្រសួងការងារ នឹងពង្រឹងកិច្ចសហប្រតិបត្តិការ រវាងគ្រឹះស្ថានអប់រំបណ្តុះបណ្តាលនៃប្រទេសអូស្ត្រាលី ជាមួយគ្រឹះស្ថាន TVET របស់កម្ពុជាឱ្យកាន់តែប្រសើរ។ នេះបើយោងតាមការចុះផ្សាយរបស់ ក្រសួងការងារបណ្តុះបណ្តាលវិជ្ជាជីវៈ កាលពីថ្ងៃទី១៤ ខែមីនា ឆ្នាំ២០២៥៕