ភ្នំពេញ៖ កម្ពុជា រកចំណូលបាន ៤០ ៤៨០៩៤៥ ដុល្លារ ពីការលក់សំបុត្រឱ្យភ្ញៀវអន្តរជាតិចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្លៀស ក្នុងរយៈពេល ១១ខែ ឆ្នាំ២០២៥ ធ្លាក់ចុះ ៣,៤១% ប្រៀបធៀបនឹង រយៈពេលដូចគ្នានៅឆ្នាំ២០២៤។

សេចក្តីប្រកាសព័ត៌មានរបស់គ្រឹះស្ថានអង្គរ នាថ្ងៃទី០១ ខែធ្នូ ឆ្នាំ២០២៥ ឱ្យដឹងថា ចំណូលជាង ៤០លានដុល្លារនេះ បានមកពីភ្ញៀវទេសចរណ៍ចំនួន ៨៦៧ ១៩៥នាក់ មកទស្សនារមណីយដ្ឋានអង្គរ ក្នុងរយៈពេល ១១ខែ ហើយចំនួននេះ ធ្លាក់ចុះ ៣,៤៧% ធៀបនឹងឆ្នាំ២០២៤។

គួរបញ្ជាក់ថា ក្នុងខែវិច្ឆិកា ឆ្នាំ២០២៥ ភ្ញៀវទេសចរចំនួន ១០១ ៦៧៧នាក់ បានទិញសំបុត្រចូលទស្សនាអង្គរ ដែលគិតជាចំណូលប្រមាណជិត ៥លានដុល្លារ (៤ ៩០៥ ១៦៤) ធ្លាក់ចុះ ១៧,១៥% ធៀបនឹងខែវិច្ឆិកា ឆ្នាំ២០២៤៕