ភ្នំពេញ៖ ក្រុមហ៊ុន MUYUAN FOOD ដែលជាក្រុមហ៊ុនវិនិយោគចិនដ៏ធំលើវិស័យកសិកម្ម មានបំណងបោះទុនវិនិយោគលើវិស័យកសិកម្មនៅកម្ពុជា។ នេះជាការលើកឡើងរបស់គណៈប្រតិភូតំណាងក្រុមហ៊ុន MUYUAN FOOD ក្នុងជំនួបជាមួយ ឯកឧត្តម យុន ហេង អគ្គលេខាធិការរងគណៈកម្មាធិការវិនិយោគកម្ពុជា នាថ្ងៃទី៣០ ខែសីហា ឆ្នាំ២០២៤។

ឯកឧត្តមអគ្គលេខាធិការរង យុន ហេង បានលើកឡើងពីក្រុមប្រឹក្សាអភិវឌ្ឍន៍កម្ពុជា ការលើកទឹកចិត្ត និងការធានាការវិនិយោគនៅកម្ពុជាក្រោមក្របខ័ណ្ឌច្បាប់វិនិយោគ ភាពលេចធ្លោនៃហេដ្ឋារចនាសម្ព័ន្ធរូបវន្តរបស់កម្ពុជាដែលកំពុងរីកដុះដាល និងស្ថេរភាពនយោបាយផងដែរ។

តំណាងក្រុមហ៊ុន MUYUAN FOOD បានបង្ហាញឆន្ទៈយ៉ាងមុតមាំក្នុងការវិនិយោគនៅកម្ពុជា និងមានទំនុកចិត្តក្នុងការផ្សព្វផ្សាយពីកម្ពុជាទៅកាន់វិនិយោគិនបរទេសថា៖ «មកវិនិយោគនៅអាស៊ាន ត្រូវនឹកឃើញដល់កម្ពុជាមុនគេ»។ នេះបើតាមការចុះផ្សាយរបស់ក្រុមប្រឹក្សាកម្ពុជា នាថ្ងៃទី៣១ ខែសីហា ឆ្នាំ២០២៤៕