ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ មានយន្តការចំនួន២ គឺតាមរយៈទីភ្នាក់ងារជាតិមុខរបរ និងការងារ (NEA) និងចុះអនុស្សរណៈនៃការយោគយល់ (MOU) ជាមួយវិស័យឯកជនជាច្រើន ដើម្បីផ្តល់សេវាគាំទ្រក្នុងការស្វែងរកការងារដល់សិស្ស ដែលបានបញ្ចប់ការសិក្សា។ នេះបើតាមការលើកឡើងរបស់ ឯកឧត្តម ហេង សួរ រដ្ឋមន្ត្រីក្រសួងការងារ កាលពីថ្ងៃទី១៥ ខែមិថុនា ឆ្នាំ២០២៥។

ឯកឧត្តមរដ្ឋមន្ត្រីការងារ បន្តថា ក្រសួងការងារ បានចុះ MOU ជាមួយសភាពាណិជ្ជកម្មកម្ពុជា និងសមាគមនិយោជកចំនួន១៧ ស្តីពីកិច្ចសហប្រតិបត្តិការលើការហាត់ការ និងចុះកម្មសិក្សា ដើម្បីគាំទ្រដល់ការបណ្ដុះបណ្តាលជំនាញវិជ្ជាជីវៈ និងបច្ចេកទេស ដែលមានសហគ្រាស ក្រុមហ៊ុនដៃគូចំនួន៣៨៦ ដែលផ្ដល់ឱកាសដល់សិស្សបានហាត់ការ និងចុះកម្មសិក្សា។ ឯកឧត្តម ហេង សួរ លើកឡើងដូច្នេះ ក្នុងពិធីប្រកាសបើកជាផ្លូវការទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ លើកទី៨ ឆ្នាំ២០២៥ ក្រោមប្រធានបទ «TVET បង្កើតឱកាសការងារ សាងក្តីសង្ឃឹមដល់យុវជន»។

សូមជម្រាបថា ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈនេះ ធ្វើឡើងក្រោមអធិបតីភាព ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា តំណាង សម្តេចធិបតី ហ៊ុន ម៉ាណែត នៅមជ្ឈមណ្ឌលសន្និបាត និងពិព័រណ៍កោះពេជ្រ៕