ភ្នំពេញ៖ ប្រមុខរាជរដ្ឋាភិបាល បានសង្ឃឹមថា ចំណូលផ្សេងៗ នឹងទទួលបាន ១ ១៧៦ប៊ីលានរៀល ត្រូវជា ០,៥៦% នៃផលិតផលសរុបក្នុងស្រុក(ផ.ស.ស.)ឬកើនឡើងចំនួន ១១% ធៀបនឹងច្បាប់ហិរញ្ញវត្ថុឆ្នាំ២០២៤ ក្នុងនោះ ចំណូលផ្សេងៗដែលមានប្រភពពីហិរញ្ញប្បទានពីក្រៅប្រទេស ដោយមិនឆ្លងកាត់រតនាគារជាតិ ត្រូវបានគ្រោងទុក ៥៦៦ប៊ីលានរៀល ត្រូវជា០,២៧% នៃផ.ស.ស.។

ជាមួយគ្នានេះ ចំណូលផ្សេងៗក្នុងប្រទេស ដែលជាចំណូលមានប្រភពពីការសងត្រឡប់មកវិញនូវប្រាក់ដើមពីសហគ្រាសសាធារណៈរបស់រដ្ឋ ត្រូវបានគ្រោងទុកចំនួន ៥៥០ប៊ីលានរៀល ត្រូវជា ០,២៦%នៃផ.ស.ស. និងចំណូលផ្សេងៗក្រៅប្រទេស ត្រូវសម្រេចឱ្យបានចំនួន ៦២៦ប៊ីលានរៀល ត្រូវជា ០,៣% នៃផ.ស.ស.។ ក្នុងចំណូលក្រៅប្រទេសដែលគ្រោងចំនួន ៦២៦ប៊ីលានរៀលនេះ មានចំណូលមូលនិធិទ្រទ្រង់ថវិកា ត្រូវបានគ្រោងចំនួន ៦១ប៊ីលានរៀល ត្រូវជា ០,០៣% នៃផ.ស.ស.។

គួរជម្រាបថា ថវិកាឆ្នាំ២០២៥ គឺមានទិសដៅជាយុទ្ធសាស្ត្រកំណត់ចំណាយសរុបថវិកាថ្នាក់ជាតិ ឱ្យស្ថិតក្នុងកម្រិតចំនួន ៣៥ ៣៩៨ប៊ីលានរៀល ត្រូវជា១៦,៩២% នៃផ.ស.ស. គឺកើនត្រឹមចំនួន ២,៦%បើធៀបនឹងច្បាប់ហិរញ្ញវត្ថុឆ្នាំ២០២៤ ក្នុងនោះមានការចំណាយឧបត្ថម្ភធនគ្រឹះស្ថានសាធារណៈរដ្ឋបាលចំនួន ៣៦២ ២៨៣លានរៀល៕