ភ្នំពេញ៖ ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម ដែលបានចុះសិក្សាវាយតម្លៃជាមួយប្រជាកសិករខេត្តកំពង់ចាម ឱ្យដឹងថា ការប្រើពូជសុទ្ធទទួលបានទិន្នផលកើន ១៥ភាគរយ កាត់បន្ថយការប្រើពូជបានប្រមាណ ៣០ភាគរយ ហើយងាយស្រួលលក់ និងទទួលបានតម្លៃខ្ពស់។

តាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២៤ ខែមករា ឆ្នាំ២០២៤ ឯកឧត្តមបណ្ឌិត យ៉ង សាំងកុមារ បានមានប្រសាសន៍ថា កាលពីឆ្នាំ២០២៣ មន្រ្តីកសិកម្មឃុំបានគាំទ្រកសិករចំនួន ២២២គ្រួសារ ឱ្យចូលរួមប្រើពូជសុទ្ធផ្ការំដួល។ តាមរយៈការចុះសិក្សាវាយតម្លៃរបស់ឯកឧត្តមបណ្ឌិតជាមួយកសិករ ក៏បានជួបប្រជុំជាមួយមន្ត្រីកសិកម្មឃុំ នៅខេត្តកំពង់ចាម ដើម្បីវាយតម្លៃលើការកសាងប្រព័ន្ធពូជសុទ្ធផ្ការំដួលនោះ។ ឯកឧត្តមបណ្ឌិត បានលើកឡើងបន្ថែមថា ចំនួនកសិករដែលប្រើពូជសុទ្ធទាំង ១០ឃុំ នៅខេត្តកំពង់ចាម អាចកើនដល់ឡើង ១ពាន់គ្រួសារ នៅរដូវខាងមុខ។

រដ្ឋលេខាធិការក្រសួងកសិកម្ម រូបនេះ បានបន្តថា តាមរយៈលទ្ធផល និងបទពិសោធនៅស្រុកជើងព្រៃ ក្រសួងកសិកម្ម រុក្ខាប្រមាញ់ និងនេសាទ នឹងជំរុញឱ្យមានការប្រើពូជសុទ្ធឱ្យបានទូលំទូលាយទូទាំងប្រទេស តាមរយៈមន្រ្តីកសិកម្មឃុំ ដែលទើបរើសចំនួន២៥០រូប និងជ្រើសរើសបន្ថែមចំនួន ៨០០នាក់ទៀត នៅក្នុងឆ្នាំ២០២៤នេះ៕