ភ្នំពេញ៖ សមត្ថកិច្ច ឃាត់ខ្លួនជនសង្ស័យចំនួន ២រូប ដែលបង្កើតគណនីតេឡេក្រាមក្លែងក្លាយ ដាក់ឈ្មោះបន្លំដូចទៅនឹង Channel Telegram ផ្លូវការរបស់ សម្តេចតេជោ ហ៊ុន សែន ប្រធានព្រឹទ្ធសភា ដើម្បីបោកបញ្ឆោតឱ្យជនរងគ្រោះដាក់ប្រាក់វិនិយោគ ប្រហែលជាង ១៨ម៉ឺនដុល្លារ។

ជនសង្ស័យ ២នាក់នោះ ដែលស្រី្តមានមុខរបរធ្វើការនៅហាងកែសម្ភស្ស និងជនសង្ស័យទី២ ជាបុរស មានមុខរបរសន្តិសុខចំណតរថយន្ត នៅផ្សារទំនើប បានបោកបញ្ឆោតឱ្យជនរងគ្រោះដាក់ប្រាក់វិនិយោគ ដើម្បីទទួលបានប្រាក់ចំណេញច្រើនក្នុងរយៈពេលខ្លី។ បច្ចុប្បន្ន ជនសង្ស័យទាំង២នាក់ខាងលើ ត្រូវបាននាយកដ្ឋានប្រឆាំងបទល្មើសបច្ចេកវិទ្យា កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី។

នាយកដ្ឋានប្រឆាំងបទល្មើសបច្ចេកវិទ្យា អំពាវនាវឱ្យពលរដ្ឋ ប្រុងប្រយ័ត្នមុននឹងសម្រេចចិត្តដាក់ប្រាក់វិនិយោគតាមប្រព័ន្ធអនឡាញ និងត្រូវពិនិត្យពិចារណាប្រភពនៃការផ្សព្វផ្សាយអំពីការវិនិយោគតាមអនឡាញផ្សេងៗឱ្យបានហ្មត់ចត់ជាមុន ចៀសវាងការខាតបង់ផលប្រយោជន៍ និងទ្រព្យសម្បត្តិដោយប្រការណាមួយ។ នេះបើតាមការចុះផ្សាយរបស់ នាយកដ្ឋានប្រឆាំងបទល្មើសបច្ចេកវិទ្យា នាថ្ងៃទី២១ ខែកុម្ភៈ ឆ្នាំ២០២៥៕