ភ្នំពេញ៖ ក្រុមហ៊ុន AMRU RICE មានទីតាំងនៅស្រុកកោះញែក កំពុងប្រមូលទិញស្រូវសរីរាង្គ និងស្រូវមិនមែនសរីរាង្គ ដែលបានចុះកិច្ចសន្យានាពេលកន្លងមករវាងក្រុមហ៊ុនសាជីវកម្មសហគមន៍កសិកម្មកម្ពុជា (CACC) និងសហគមន៍កសិកម្មចំនួន៦ ស្មើនឹង ៦កិច្ចសន្យា ដែលមានបរិមាណសរុបចំនួន ៤ ៦៧២តោន។

ឯកឧត្តម អ៊ួង កុសល រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា បច្ចុប្បន្ន ក្រុមការងារជំនាញប្រមូលទិញ បានចំនួន ៩៧១,៥៧ តោន ក្នុងនោះ ប្រភេទស្រូវអង្ករស សរីរាង្គចំនួន ៩៦០,៣៧តោន ស្រូវសែនក្រអូប (មិនមែនសរីរាង្គ) ៨,៤៨០តោន និងស្រូវដំណើបខ្មៅសរីរាង្គ ២,៧២០តោន ស្មើនឹង ២០,៧៨% នៃផែនការឆ្នាំ។ ប្រភេទស្រូវអង្ករសសរីរាង្គ តម្លៃ ៩៥០៛ ក្នុងមួយគីឡូក្រាម, ស្រូវសែនក្រអូប (មិនមែនសរីរាង្គ) តម្លៃ ៨៣០៛ ក្នុងមួយគីឡូក្រាម និងស្រូវដំណើបខ្មៅសរីរាង្គតម្លៃ ២០០០៛ ក្នុងមួយគីឡូក្រាម។

ឯកឧត្តម អ៊ួង កុសល បានណែនាំដល់ក្រុមហ៊ុនប្រមូលទិញស្រូវ សហគមន៍កសិកម្ម មន្រ្តីកសិកម្មឃុំ ជួយសម្របសម្រួល បន្តកិច្ចសហប្រតិបត្តិការយ៉ាងជិតស្និទ្ធដើម្បីធានាលំហូរនៃការប្រមូលទិញ ឱ្យគ្រប់ទៅតាមតាមផែនការកំណត់៕