ភ្នំពេញ៖ សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃកម្ពុជា លើកទឹកចិត្តឱ្យឯកឧត្តម ស៊ូវគី មេឌីហ្សាដា ឯកអគ្គរដ្ឋទូតនៃសាធារណរដ្ឋអាស៊ែបៃហ្សង់ ជួយទាក់ទាញអ្នកវិនិយោគអាស៊ែបៃហ្សង់ឱ្យមកស្វែងរកឱកាសវិនិយោគថ្មីៗបន្ថែមទៀតនៅកម្ពុជា លើឧស្សាហកម្មកែច្នៃ ឧស្សាហកម្មថាមពល និងកម្មន្តសាល ដែលជាវិស័យដ៏មានសក្តានុពលនៅក្នុងតំបន់ និងសកលលោក។

ក្នុងជំនួបនាថ្ងៃទី៣១ ខែមករា ឆ្នាំ ២០២៥ សម្តេច ឃួន សុដារី ក៏បានលើកឡើងថា ប្រទេសទាំងពីរនៅមានសក្តានុពលផ្សេងៗ ដើម្បីជំរុញ និងបង្កើនការវិនិយោគ ដែលក្នុងនោះការនាំចេញនូវផលិតផលកសិកម្មពីកម្ពុជាទៅអាស៊ែបៃហ្សង់ មានដូចជា អង្ករ ម្រេច ផ្លែស្វាយ គ្រាប់ស្វាយចន្ទី និងវិស័យសុខាភិបាលជាដើម។ សម្តេច ឃួន សុដារី ក៏បានគូសបញ្ជាក់ថា កម្ពុជា កំពុងទទួលបានការចាប់អារម្មណ៍ និងទាក់ទាញអ្នកវិនិយោគយ៉ាងច្រើន ក្នុងវិស័យឧស្សាហកម្មទំាងនោះ ដោយសារកត្តាគោលនយោបាយពន្ធនាំចេញ ភូមិសាស្រ្ត នៃកំពង់ផែកម្ពុជា ដែលមានលក្ខណៈអំណោយផល ផ្ដល់ភាពងាយស្រួលក្នុងការដឹកទំនិញចេញចូលតាមផ្លូវទឹក។

ជាមួយគ្នានេះ ឯកឧត្តម ស៊ូវគី មេឌីហ្សាដា បានលើកឡើងថានឹងខិតខំលើកកម្ពស់ទំនាក់ទំនងប្រទេសទំាងពីរឱ្យកាន់តែរឹងមាំ និងរីកចម្រើនបន្ថែមទៀត ដោយក្នុងនោះឯកអគ្គរដ្ឋទូតនៃសាធារណរដ្ឋអាស៊ែបៃហ្សង់ ក៏បានសន្យាថានឹងកៀរគរអ្នកវិនិយោគអាស៊ែបៃហ្សង់ មកកម្ពុជាបន្ថែមទៀតផងដែរ។ ឯកឧត្តម ស៊ូវគី មេឌីហ្សាដា បានបន្តថា តាមរយៈកិច្ចសហប្រតិបត្តិការរបស់រដ្ឋសភា បានលើកកម្ពស់ទំនាក់ទំនងប្រទេសទំាងពីរឱ្យមានការរីកចម្រើន និងរឹងមាំជាលំដាប់ទំាងខាងស្ថាប័ននីតិប្បញ្ញត្តិនិងនីតិប្រតិបត្តិ៕