ភ្នំពេញ៖ កម្ពុជា និងអូស្រ្តាលី ពិភាក្សាស្វែងយល់អំពីគោលនយោបាយ និងកាលានុវត្តភាពវិនិយោគ សំដៅជំរុញវិនិយោគិនអូស្រ្តាលី ឱ្យមកបណ្ដាក់ទុនវិនិយោគបន្ថែមទៀត ក្នុងវិស័យសក្ដានុពលនៅកម្ពុជា ដូចជាវិស័យកសិកម្ម កសិ-ឧស្សាហកម្ម ថាមពលបៃតង ការបណ្តុះបណ្តាលវិជ្ជាជីវៈ និងវិស័យទេសចរណ៍។ នេះបើតាមការចុះផ្សាយរបស់ ក្រុមប្រឹក្សាអភិវឌ្ឍកម្ពុជា (CDC)។

ក្នុងជំនួបពិភាក្សារវាង ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា និងឯកឧត្ដម Will Nankervis អនុរដ្ឋលេខាធិការ (Assistant Secretary) ក្រសួងការបរទេស និងពាណិជ្ជកម្មអូស្រ្តាលី ទទួលបន្ទុកផ្នែកទំនាក់ទំនង និងវិភាគសេដ្ឋកិច្ចតំបន់អាស៊ីអាគ្នេយ៍ ភាគីទាំងពីរ ក៏បានផ្លាស់ប្ដូរយោបល់គ្នាផងដែរ ពីបរិការណ៍វិវឌ្ឍយ៉ាងឆាប់រហ័ស និងភាពមិនប្រាកដប្រជានៃការអនុវត្តប្រព័ន្ធពាណិជ្ជកម្មនាពេលបច្ចុប្បន្ន។

ឯកឧត្តម នុត អ៊ុនវ័ណរ៉ា អរគុណចំពោះរដ្ឋាភិបាល និងប្រជាជនអូស្រ្តាលី ដែលតែងតែផ្ដល់ការគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា ជាពិសេសការផ្ដល់ការគាំទ្រទៅលើកិច្ចការទាក់ទាញវិនិយោគរបស់ក្រុមប្រឹក្សាអភិវឌ្ឍន៍កម្ពុជា ការពង្រឹងនិងពង្រីកកិច្ចសហប្រតិបត្តិការអភិវឌ្ឍ និងការចូលរួមចំណែកលើកកម្ពស់សមត្ថភាពស្ថាប័ន តាមរយៈកម្មវិធីភាពជាដៃគូកម្ពុជា អូស្រ្តាលីសម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED)៕