ភ្នំពេញ៖ Bitcoin គឺជារូបិយប័ណ្ណអេឡិចត្រូនិក ឬរូបិយប័ណ្ណឌីជីថលមួយប្រភេទ នៅក្នុងចំណោម រូបិយប័ណ្ណឌីជីថល ឬរូបិយប័ណ្ណគ្រីបតូជាច្រើន (Crypto Currency) ដែលបង្កើតឡើងដោយការរួមបញ្ចូលគ្នារវាងបច្ចេកវិទ្យា និងរូបមន្តគណិតវិទ្យាដែលមានភាពស្មុគស្មាញ។

ជាមួយគ្នានេះ ក្រុមការងារបច្ចេកទេស នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក៏បានអំពាវនាវឱ្យប្រជាពលរដ្ឋបង្កើនការប្រុងប្រយ័ត្នឱ្យបានខ្ពស់ ចំពោះការវិនិយោគជាមួយរូបិយប័ណ្ណអេឡិចត្រូនិក Bitcoin និងរូបិយប័ណ្ណអេឡិកត្រូនិកផ្សេងទៀត ដែលអាចនាំឲ្យកើតមានហានិភ័យជាច្រើន។

ហានិភ័យដែលអាចកើតមាននោះ មានដូចជា៖ ប្រឈមនឹងការចាញ់បោកឈ្មួញកណ្ដាល ដែលប្រើប្រាស់មធ្យោបាយអូសទាញប្រើកម្មវិធី (App) ឬគេហទំព័រក្លែងបន្លំ, ប្រឈមនឹងការបាត់បង់ ដែលបង្កដោយឧក្រិដ្ឋជនបច្ចេកវិទ្យាលួចយករូបិយប័ណ្ណអេឡិចត្រូនិក ឬទ្រព្យសម្បត្តិឌីជីថល, ជនខិលខូចអាចប្រើប្រាស់គម្រោងបោកប្រាស់បន្តគ្នា PONZI SCHEMEE ដែលលសន្យាថានឹងទទួលបានផលចំណេញខ្ពស់ដល់អ្នកវិនិយោគ និងធ្លាក់ចូលអន្ទាក់ពាក់ព័ន្ធនឹងបទល្មើសបច្ចេកវិទ្យាផ្សេងៗជាដើម៕