ភ្នំពេញ៖ «រូបិយប័ណ្ណឌីជីថល» បានក្លាយជាប្រធានបទគួរឱ្យចាប់អារម្មណ៍កម្រិតពិភពលោក នៅប៉ុន្មានឆ្នាំចុងក្រោយនេះ ខណៈដែលរូបិយប័ណ្ណឌីជីថល ផ្តល់នូវអត្ថប្រយោជន៍យ៉ាងច្រើន ដូចជា ជំរុញផលិតភាពផលិតកម្ម និងសេដ្ឋកិច្ចឱ្យរីកចម្រើន ជាដើម។ នេះបើតាមការឱ្យដឹងពីធនាគារជាតិនៃកម្ពុជា នៅថ្ងៃទី១៥ ធ្នូនេះ។

តាមរយៈកម្មវិធីសន្និសីទអន្តរជាតិ MOEF-BOK-FSC-IMF ឆ្នាំ២០២៣ ក្រោមមូលបទ៖«រូបិយប័ណ្ឌឌីជីថល ដោយផ្តោតលើយុទ្ធសាស្ត្រកែប្រែទិដ្ឋភាពហិរញ្ញវត្ថុ (Navigating a Changing Financial Landscape)» នៅទីក្រុងសេអ៊ូល នៃសាធារណរដ្ឋកូរ៉េ នៅថ្ងៃទី១៥ ខែធ្នូ ឆ្នាំ២០២៣ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានចែករំលែកទស្សនទានទាក់ទងនឹង«រូបិយប័ណ្ណឌីជីថល» ដោយកម្ពុជា បានអភិវឌ្ឍន៍ និងដាក់ឱ្យដំណើរការប្រព័ន្ធបាគងរួចហើយ ដែលប្រព័ន្ធនេះក៏អាច ចាត់ទុកថា ជាទម្រង់មួយនៃរូបិយប័ណ្ណឌីជីថលផងដែរ។ លោកជំទាវបណ្ឌិត ជា សិរី ពន្យល់ថា ប្រព័ន្ធនេះ មានចំណុចពិសេសៗស្រដៀងគ្នានឹងរូបិយប័ណ្ណឌីជីថលធនាគារកណ្តាល (DBDC)។

បើតាមការចុះផ្សាយរបស់ធនាគារជាតិនៃកម្ពុជា រូបិយប័ណ្ណឌីជីថល ក៏បានចូលរួមបង្កើនប្រសិទ្ធភាពប្រតិបត្តិការអាជីវកម្ម, កាត់បន្ថយចំណាយថ្លៃដើម និងលើកកម្ពស់បរិយាបន្នហិរញ្ញវត្ថុផងដែរ ខណៈដែលរូបិយប័ណ្ណឌីជីថល ក៏អាចមានហានិភ័យមួយចំនួនទៅលើស្ថិរភាពហិរញ្ញវត្ថុ និងកិច្ចការពារអ្នកប្រើប្រាស់រូបិយប័ណ្ណ។

សន្និសីទអន្តរជាតិ MOEF-BOK-FSC-IMF ខាងលើត្រូវបានរៀបចំឡើង ក្នុងគោលបំណងប្រមូលផ្តុំគំនិតសំខាន់ៗរបស់អ្នកជំនាញ, អ្នកបង្កើតគោលនយោបាយ និងអ្នកសិក្សាស្រាវជ្រាវមកពីជុំវិញពិភពលោក ដើម្បីចែករំលែកបទពិសោធ និងពិភាក្សាលើបញ្ហាគោលនយោបាយសំខាន់ៗជុំវិញរូបិយប័ណ្ណឌីជីថល៕