ភ្នំពេញ៖ ឧកញ៉ាបណ្ឌិត ឃុន ចាន់ថា ប្រធានអគ្គនាយកក្រុមហ៊ុន GTV MOTOR បានថ្លែងសុន្ទរកថា ថា ការលេចឡើងនូវផលិតផលរថយន្តជាតិ គឺជាប្រវត្តិសាស្រ្តថ្មីមួយរបស់កម្ពុជា ហើយបាននិងកំពុងរួមចំណែកក្នុងការគាំទ្រផលិតផលជាតិ តាមរយៈការផ្គត់ផ្គង់ទីផ្សាររថយន្តដល់ប្រជាពលរដ្ឋក្នុងស្រុក និងនាំចេញទៅទីផ្សារក្រៅស្រុក រួមទាំងលើកស្ទួយសេដ្ឋកិច្ចជាតិ និងនវានុវត្តន៍វិស័យឧស្សាហកម្មយានយន្តកម្ពុជា ឱ្យកាន់តែប្រសើរឡើង។

ក្នុងពិធីបើកសម្ពោធ និងបើកបរសាកល្បង រថយន្ត GTV រថយន្តជាតិដំបូងគេបង្អស់របស់កម្ពុជា ឧកញ៉ាបណ្ឌិត ប្រធានអគ្គនាយកក្រុមហ៊ុន បានសង្ឃឹមថា GTV នឹងរួមចំណែកជាមួយរាជរដ្ឋាភិបាល វិស័យឯកជន និងដៃគូសហប្រតិបត្តិការក្នុង និងក្រៅស្រុក ធ្វើឱ្យរោងចក្រដំឡើងរថយន្តមួយនេះ ក្លាយជារោងចក្រដែលមានការវិនិយោគយូរអង្វែង។

ឧកញ៉ាបណ្ឌិត ឃុន ចាន់ថា បានលើកឡើងបន្តទៀតថា GTV នឹងចូលរួមជាមួយរាជរដ្ឋាភិបាល វិស័យឯកជន និងដៃគូសហប្រតិបត្តិការក្នុង និងក្រៅស្រុក ធ្វើឱ្យ GTV MOTOR ក្លាយជារោងចក្រ ដែលមានសមត្ថភាពបង្កើតរោងចក្រជាច្រើនទៀត ស្របនឹងចក្ខុវិស័យរបស់រាជរដ្ឋាភិបាលកម្ពុជា ក្នុងការប្រែក្លាយវិស័យឧស្សាហកម្មយាយន្ត និងអេឡិចត្រូនិកឱ្យទៅជាមជ្ឈមណ្ឌលប្រមូលផ្តុំសកម្មភាពផលិតគ្រឿងបង្គុំយានយន្ត និងបរិក្ខារអេឡិចត្រូនិក ដើម្បីនាំចេញទៅទីផ្សារក្នុងតំបន់ និងសកលលោក៕