ភ្នំពេញ៖ កម្ពុជា-កាហ្សាស្ថាន នឹងពង្រឹង និងពង្រីកទំនាក់ទំនងទ្វេភាគីឱ្យកាន់តែស៊ីជម្រៅ និងជំរុញកិច្ចសហប្រតិបត្តិការដែលមានសក្តានុពល ដូចជាលើវិស័យពាណិជ្ជកម្ម និងវិនិយោគ ទេសចរណ៍ និងវប្បធម៌។ នេះបើតាមការចុះផ្សាយរបស់ក្រសួងការបរទេស និងសហប្រតិបត្តិការអន្តរជាតិ។

ក្នុងជំនួប កាលពីថ្ងៃទី២១ ខែកុម្ភៈ ឆ្នាំ២០២៥ លោកជំទាវ អ៊ាត សោភា រដ្ឋមន្រ្តីស្តីទី នៃក្រសួងការបរទេស និងសហប្រតិបត្តិការអន្តរជាតិ និងឯកឧត្តម Kanat TUMYSH ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋកាហ្សាក់ស្ថាន ប្រចាំកម្ពុជា ក៏បានចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចពិគ្រោះយោបល់នយោបាយរវាងក្រសួងការបរទេសទាំងពីរផងដែរ។

លោកជំទាវ អ៊ាត សោភា សង្ឃឹមថា ការបន្តដំណើរការជើងហោះហើរត្រង់រវាងកម្ពុជា និងកាហ្សាក់ស្ថាន នឹងជួយលើកកម្ពស់វិស័យទេសចរណ៍ ការតភ្ជាប់រវាងប្រជាជន និងប្រជាជន និងពង្រីកកាលានុវត្តភាពធុរកិច្ចរវាងប្រទេសទាំងពីរ។ ក្នុងកិច្ចពិភាក្សានោះដែរ ភាគីទាំងពីរ ក៏បានប្តេជ្ញាបន្តពង្រឹងកិច្ចសហប្រតិបត្តិការ និងគាំទ្រគ្នាទៅវិញទៅមកលើវេទិកាអន្តរជាតិ និងបានគូសបញ្ជាក់ពីសារសំខាន់នៃកិច្ចពិគ្រោះយោបល់រវាងក្រសួងការបរទេសទាំងពីរ ដោយបានឯកភាពគ្នាកំណត់ពេលវេលាប្រជុំលើកទី១ ក្នុងពេលឆាប់ៗខាងមុខ៕