ភ្នំពេញ៖ បេក្ខជន ដែលមានឈ្មោះក្នុងបញ្ជីជម្រុះ (Short list) បានដាក់ពាក្យសុំប្រឡងជ្រើសរើសអាហារូបករណ៍ទៅសិក្សានៅប្រទេសហុងគ្រី ក្នុងឆ្នាំ២០២៥-២០២៦ នឹងត្រូវប្រឡងនៅថ្ងៃទី០៩ ខែកុម្ភៈ ឆ្នាំ២០២៥ ចាប់ពីម៉ោង ៧:០០នាទីព្រឹក ស្ថិតនៅវិទ្យាល័យព្រះស៊ីសុវត្ថិ។ នេះបើតាមការចុះផ្សាយរបស់ក្រសួងអប់រំ យុវជន និងកីឡា កាលពីថ្ងៃទី០៤ ខែកុម្ភៈ ឆ្នាំ២០២៥។

បេក្ខជន នឹងត្រូវប្រឡងលើវិញ្ញាសាសរសេរ ដែលរៀបចំដោយក្រសួងអប់រំ ក្នុងនោះ ថ្នាក់ក្រោយឧត្តមសិក្សា (Ph.D និង Master) ត្រូវប្រឡងវិញ្ញាសាវប្បធម៌ទូទៅ និងភាសាអង់គ្លេស ហើយថ្នាក់ឧត្តមសិក្សា (BA / BSc និង OTM) ត្រូវប្រឡងលើវិញ្ញាសា គណិតវិទ្យា និងភាសាអង់គ្លេស។ ដោយឡែក សម្រាប់រយៈពេលដែលត្រូវប្រឡង គឺរយៈពេល ១ម៉ោង ៣០នាទី។

បញ្ជីឈ្មោះបេក្ខជនប្រឡង នឹងត្រូវបិទផ្សាយនៅនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន នៅថ្ងៃទី០៨ ខែកុម្ភៈ ឆ្នាំ២០២៥ និងនៅមណ្ឌលប្រឡង វិទ្យាល័យព្រះស៊ីសុវត្ថិ មុនម៉ោង ៧:០០នាទីព្រឹក នាថ្ងៃទី០៩ ខែកុម្ភៈ ឆ្នាំ២០២៥៕