ភ្នំពេញ៖ ក្រុមហ៊ុន រោងចក្រ និងសហគ្រាសធំៗចំនួន១៥០ នឹងផ្តល់ឱកាសការងារជាង ៣ម៉ឺនកន្លែង ដល់យុវជន សិស្ស និសិ្សត និងអ្នកស្វែងរកការរងារ។ តាមការចុះផ្សាយរបស់ក្រសួងការងារ និងបណ្តុះបណ្តាលវិជ្ជាជីវៈ នាថ្ងៃទី១១ ខែតុលា ឆ្នាំ២០២៤ ការផ្តល់ឱកាសការងារចំនួន ៣ម៉ឺនកន្លែងនេះ ធ្វើឡើងក្នុងពិព័រណ៍ការងារ និងផលិតភាពជាតិ ឆ្នាំ២០២៤។

ក្រសួងការងារ បានឱ្យដឹងថា ពិព័រណ៍ការងារ និងផលិតភាពជាតិ ឆ្នាំ២០២៤ នឹងប្រារព្ធឡើងនៅថ្ងៃទី២៦-២៧ ខែតុលា ឆ្នាំ២០២៤ នៅអាគារពិព័រណ៍កោះពេជ្រ។ ពិព័រណ៍ការងារនេះ ត្រូវបានសហការជាមួយទីភ្នាក់ងារជាតិមុខរបរ និងការងារ, សហភាពសហព័ន្ធយុវជនកម្ពុជារាជធានីភ្នំពេញ, សមាគមវាយនភណ្ឌ សម្លៀកបំពាក់ ស្បែកជើង និងផលិតផល ដែលធ្វើដំណើរនៅកម្ពុជា និងមូលនិធិអភិវឌ្ឍន៍ជំនាញ និងទទួលបានការគាំទ្រដោយអង្គការអន្តរជាតិខាងការងារ និងដៃគូពាក់ព័ន្ធជាច្រើនទៀត។

យុវជន សិស្ស និសិ្សត និងអ្នកស្វែងរកការរងារ អាចដាក់ពាក្យ និងសម្ភាសការងារភ្លាមៗជាមួយតំណាងក្រុមហ៊ុនធំៗជាច្រើន និងអាចចូលរួមក្នុងសិក្ខាសាលាអំពីការលើកកម្ពស់ផលិតភាពដែលមានការចែករំលែកចំណេះដឹង។ ប្រសិនបើ យុវជន សិស្ស និសិ្សត និងអ្នកស្វែងរកការរងារ ដែលចង់ដឹងព័ត៌មានបន្ថែម អាចទាក់ទងមកតាមរយៈ ១២៩៧ ឬ ១២៨៦៕