ភ្នំពេញ៖ ឆ្នាំ២០២៤ កម្ពុជា សម្រេចបានការប្រមូលទិន្នផលគ្រាប់ស្វាយចន្ទីឆៅសរុបចំនួន ៨៥ម៉ឺនតោន ក្នុងនោះការនាំចេញគ្រាប់ស្វាយចន្ទីឆៅបានចំនួន ៨១៥ពាន់តោន កើនឡើង ២១% គិតជាទឹកប្រាក់ទទួលបាន ១ ១៥០លានដុល្លារ កើនឡើង ២៦,១៥%។ បើតាមរបាយការណ៍ប្រចាំឆ្នាំ២០២៤ របស់សមាគមស្វាយចន្ទីកម្ពុជា នាថ្ងៃទី១០ ខែតុលា ឆ្នាំ២០២៥ បានឱ្យដឹងថា កម្ពុជា បាននាំចេញគ្រាប់ស្វាយចន្ទីទៅវៀតណាមមាន ៧៩៥ ពាន់តោន។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា សហគ្រាសកែច្នៃស្វាយចន្ទីក្នុងស្រុកមួយចំនួនមិនអាចរកទុនបង្វិលដើម្បីទិញគ្រាប់ស្តុកទុកសម្រាប់កែច្នៃបាន ដែលធ្វើឱ្យគ្រាប់ស្វាយចន្ទីឆៅចំនួន ៩៥%ត្រូវបាននាំចេញទៅក្រៅប្រទេស។ លោក អួន ស៊ីឡុត បានបន្តថា ការមិនអាចរកទុនបង្វិលបាន គឺដោយសារលក្ខខណ្ឌនៃប្រាក់កម្ចីមានភាពសាំញាំ។

ប្រធានសមាគមស្វាយចន្ទីកម្ពុជា បានបញ្ជាក់ថា តាមរយៈការបង្កើតគោលនយោបាយជាតិស្ដីពីស្វាយចន្ទី ២០២២-២០២៧ បានធ្វើឱ្យគ្រឹះស្ថានធនាគារមួយចំនួនចាប់ផ្ដើមផ្ដល់កម្ចីអត្រាការប្រាក់អនុគ្រោះដល់សហគ្រាសកែច្នៃក្នុងស្រុកផងដែរ៕