ភ្នំពេញ៖ លោកជំទាវបណ្ឌិត ជា សិរី ទេសាភិបាលធនាគារជាតិ ស្នើឱ្យ ឯកឧត្តម Wang Wenbin គណៈប្រតិភូនៃស្ថានទូតចិនប្រចាំកម្ពុជា គាំទ្រការតភ្ជាប់ប្រព័ន្ធទូទាត់ឆ្លងដែនប្រទេសទាំងពីរ ដើម្បីភាពងាយស្រួល ផ្តល់ជាជម្រើសក្នុងការទូទាត់ឆ្លងដែន ដែលជាផ្នែកមួយក្នុងការទាក់ទាញវិនិយោគិន ពង្រឹងទំហំពាណិជ្ជកម្ម ការធ្វើធុរកិច្ច និងទេសចរចិនមកកម្ពុជា។

ពាក់ព័ន្ធនឹងការស្នើសុំខាងលើ ឯកឧត្តម Wang Wenbin បានយល់ព្រមគាំទ្រលើការបន្តការតភ្ជាប់ប្រព័ន្ធទូទាត់រវាងប្រទេសទាំងពីរ ដើម្បីសម្រួលដល់ការទូទាត់ឆ្លងដែន និងពង្រឹកទំហំពាណិជ្ជកម្ម ស្របតាមចក្ខុវិស័យរបស់ថ្នាក់ដឹកនាំនៃប្រទេសទាំងពីរ។ លើសពីនេះ ឯកឧត្តម Wang Wenbin បានវាយតម្លៃចំពោះចំណងមិត្តភាពដែកថែបលើគ្រប់វិស័យ ពិសេសកិច្ចសហប្រតិបត្តិការផ្នែកហិរញ្ញវត្ថុដ៏ល្អរវាងប្រទេសទាំងពីរផងដែរ។

ដើម្បីសម្រួលដល់ការទូទាត់ឆ្លងដែន ស្របតាមចក្ខុវិស័យរបស់ថ្នាក់ដឹកនាំកម្ពុជា-ចិន ថ្នាក់ដឹកនាំស្ថាប័នខាងលើទាំងពីរ បានពិភាក្សាអំពីកិច្ចសហប្រតិបត្តិការទ្វេភាគីកម្ពុជា-ចិន ពិសេសក្នុងវិស័យធនាគារនិងហិរញ្ញវត្ថុ។ ក្នុងជំនួប កាលពីថ្ងៃទី៩ ខែធ្នូ ឆ្នាំ២០២៤ លោកជំទាវបណ្ឌិត ជា សិរី បានលើកឡើងពីកិច្ចសហប្រតិបត្តិការរវាងធនាគារជាតិកម្ពុជា ជាមួយធនាគារកណ្តាលចិន គ្រឹះស្ថានធនាគារនិងហិរញ្ញវត្ថុចិន និងក្រុមហ៊ុនចិនមួយចំនួនផងដែរ និងបញ្ជាក់ពីប្រព័ន្ធទូទាត់ឆ្លងដែនដែលត្រូវបានតភ្ជាប់ និងប្រតិបត្តិការទូទាត់ផ្ទាល់ដោយប្រើប្រាស់រូបិយវត្ថុជាតិកម្ពុជា-ចិន។ ក្រោមក្របខ័ណ្ឌនៃកិច្ចសហប្រតិបត្តិការនេះ ទេសចរចិន អាចប្រើប្រាស់កម្មវិធីទូរសព្ទដៃក្នុងការទូទាត់នៅកម្ពុជាតាមឃ្យូអរកូដ។

នាឱកាសនោះ លោកជំទាវបណ្ឌិត ជា សិរី និង ឯកឧត្តម Wang Wenbin បានបង្ហាញឆន្ទៈពង្រឹងកិច្ចសហការរួមគ្នាឱ្យកាន់តែរឹងមាំថែមទៀត ពិសេសវិស័យធនាគារនិងហិរញ្ញវត្ថុ ដើម្បីរួមចំណែកជំរុញពាណិជ្ជកម្ម និងវិស័យផ្សេងទៀតឱ្យកាន់តែរីកចម្រើន៕