ភ្នំពេញ៖ ក្រសួងពាណិជ្ជកម្ម បើកវគ្គបណ្តុះបណ្តាល ស្តីពី «យុទ្ធសាស្រ្តធ្វើធុរកិច្ចក្នុងយុគសម័យទីផ្សារឌីជីថល» ដល់សហគ្រិន និងអាជីវករខេត្តកំពង់ចាម ដើម្បីពង្រឹងសមត្ថភាពសហគ្រិន និងឆ្លើយតបទៅនឹងការវិវត្តរបស់បចេ្ចកវិទ្យាឌីជីថល ព្រមទាំងចូលរួមជំរុញការផ្សព្វផ្សាយ និងលក់ផលិតផល ឬសេវាកម្មឱ្យដល់ដៃអតិថិជនទាំងក្នុង និងក្រៅប្រទេស បានឆាប់រហ័ស និងមានប្រសិទ្ធភាព។

វគ្គបណ្តុះបណ្តាលនេះ ក៏ជាផ្នែកមួយក្នុងការចូលរួមចំណែកគាំទ្រ និងលើកទឹកចិត្តដល់ធុរជន ឱ្យងាកមកប្រើប្រាស់បច្ចេកវិទ្យាក្នុងវិស័យធុរកិច្ចឱ្យបានកាន់តែច្រើន ដើម្បីអាចជួយការងារអាជីវកម្ម ខ្សែច្រវាក់ផលិតកម្ម ការគ្រប់គ្រងស្តុក ការគ្រប់គ្រងឯកសារ និងការគ្រប់គ្រងហិរញវត្ថុ ព្រមទាំងកាត់បន្ថយហានិភ័យក្នុងការប្រើប្រាស់ច្ចេកវិទ្យាឌីជីថលផងដែរ។

វគ្គបណ្តុះបណ្តាលនេះ ក៏ជាស្ពានតភ្ជាប់ទំនាក់ទំនងរវាងក្រុមហ៊ុន សហគ្រាស អាជីវករ ដែលមានផលិតផលខ្មែរ ដើម្បីដាក់ផ្សព្វផ្សាយនៅគេហទំព័រ Cambodiatrade.com នៃក្រសួងពាណិជ្ជកម្ម និងបែបបទ នៃការបញ្ជូនផលិតផលចូលក្នុងផ្សារទំនើបផ្សេងៗនៅប្រទេសកម្ពុជា។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី០៣ ខែមេសា ឆ្នាំ២០២៥។

ពាក់ព័ន្ធនឹងពិធីបើកវគ្គបណ្តុះបណ្តាល ដែលធ្វើឡើងពីថ្ងៃទី១ ខែមេសា ឆ្នាំ២០២៥ នេះ ក៏មានការអញ្ជើញចូលរួម ពីឯកឧត្តម កៅ កោសល អនុរដ្ឋលេខាធិការក្រសួងពាណិជ្ជកម្ម និងឯកឧត្តម ឡោ ចាន់លី អភិបាលរង នៃគណៈអភិបាលខេត្តកំពង់ចាម ព្រមទាំងរដ្ឋបាលខេត្ត មន្ទីរ អង្គភាពពាក់ព័ន្ធ សភាពាណិជ្ជកម្ម ក្រុមហ៊ុន សហគ្រាស សហគមន៍ សមាគម ផលិតករ អាជីវករ និស្សិត ក្នុងខេត្តកំពង់ចាម ផងដែរ៕