ភ្នំពេញ៖ អង្គភាព CMAC ស្នើសុំរដ្ឋាភិបាលចិន ផ្តល់ជំនួយលើគម្រោង «China-Aided Project for Landmine Impact Free Cambodia 2030 and Maximum ERW Reduction» ដែលមានរយពេល៣ឆ្នាំ គឺ ២០២៦-២០២៨ ដោយផ្តោតលើកិច្ចប្រតិបត្តិការបោសសម្អាតគ្រាប់មីន គ្រាប់បែកចង្កោម និងយុទ្ធភណ្ឌសង្រ្គាមមិនទាន់ផ្ទុះ។

ឯកឧត្តម ហេង រតនា អគ្គនាយក នៃមជ្ឈមណ្ឌលសកម្មភាពកំចាត់មីនកម្ពុជា (CMAC) លើកឡើងថា គម្រោងខាងលើនេះ ក៏ផ្តោតសំខាន់ផងដែរ លើការជួយជនរងគ្រោះដោយសារគ្រាប់មិន និងគ្រាប់មិនទាន់ផ្ទុះ ដោយមានផែនការបោសសម្អាតផ្ទៃដីសរុប ១៣៥គីឡូម៉ែត្រក្រឡា ស្ថិតក្នុងខេត្តចំនួន៦ រួមមានខេត្តកំពង់ធំ ក្រចេះ ឧត្តមានជ័យ ព្រះវិហារ សៀមរាប និងខេត្តស្ទឹងត្រែង។

គួរបញ្ជាក់ថា CMAC បាននិងកំពុងអនុវត្តន៍លើ «គម្រោងជំនួយចិនលុបបំបាត់គ្រាប់មីននៅកម្ពុជា (The China-Aided Cambodia Landmine Elimination Project)» តាំងពីឆ្នាំ២០១៨ រហូតដល់ខែកក្កដា ឆ្នាំ២០២៥ ដោយសម្រេចលទ្ធផល ដូចជា៖ រំដោះផ្ទៃដីសរុបចំនួន ១៦.៤៤១.០៩៦ម៉ែត្រក្រឡាស្មើ១៦០ គីឡូម៉ែត្រក្រឡា, រកឃើញគ្រាប់មីន និងយុទ្ធភណ្ឌសំណល់សង្រ្គាមសរុបចំនួន ៩៥.៧៧០គ្រាប់, ឆ្លើយតបសំណើរបស់ពលរដ្ឋ និងអាជ្ញាធរមូលដ្ឋានសរុបចំនួន ៥.៣៣២សំណើ, ផ្សព្វផ្សាយអំពីគ្រោះដោយសារគ្រាប់មីន និងយុទ្ធភណ្ឌមិនទាន់ផ្ទុះដល់ប្រជាពលរដ្ឋសរុបចំនួន ៣.៣៥០.៥១៦នាក់ និងផ្តល់ផលប្រយោជន៍ដល់ពលរដ្ឋផ្ទាល់ និងប្រយោលសរុបចំនួន ២.៦១១.៩១៨នាក់ គិតចាប់ពី ឆ្នាំ២០១៨ ដល់ឆ្នាំ២០២៤៕