ភ្នំពេញ៖ ទំហំសេដ្ឋកិច្ចកម្ពុជាកើនឡើងកាន់តែធំ ការខ្វះលទ្ធភាពប្រើប្រាស់គោលនយោបាយរូបិយវត្ថុដោយពេញលេញ បានធ្វើឱ្យសេដ្ឋកិច្ចកាន់តែងាយរងគ្រោះ បណ្ដាលឱ្យពឹងផ្អែកតែទៅលើនយោបាយសារពើពន្ធ។ នេះជាការថ្លែងរបស់លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា កាលពីថ្ងៃទី១០ ខែវិច្ឆិកានេះ ក្នុងកម្មវិធីបើកសិក្ខាសាលាផ្សព្វផ្សាយសៀវភៅ«ដុល្លាររូបនីយកម្មនៅកម្ពុជា»។

លោកជំទាវបណ្ឌិត ជា សិរី បានបន្តលើកឡើងថា ដុល្លាររូបនីយកម្ម បានរួមចំណែកជួយស្តាសេដ្ឋកិច្ច និងអមដំណើរនៃការសម្រេចបានកំណើនសេដ្ឋកិច្ចខ្ពស់ ជាមួយនឹងស្ថិរភាពម៉ាក្រូសេដ្ឋកិច្ចក្នុងរយៈពេលជាងពីរទសវត្សរ៍ចុងក្រោយនេះ។ លោកជំទាវទេ អះអាងថា បច្ចុប្បន្នស្ទើតែគ្រប់ប្រទេសទាំងអស់ លម្ហគោលនយោបាយសារពើពន្ធបានរួមតូចទៅៗ ដោយសារតែវិបត្តិផ្ទួនៗ ហើយប្រទេសនានាលើពិភពលោកបានពឹងផ្អែកកាន់តែច្រើនទៅលើគោលនយោបាយរូបិយវត្ថុ ដើម្បីស្តាកំណើនសេដ្ឋកិច្ច។

ក្រោយវិបត្តិកូវីដ១៩ ធនាគារកណ្ដាលភាគច្រើនបានបង្កើនអាត្រាការប្រាក់គោលមកវិញ ដើម្បីប្រឆាំងនឹងការកើនឡើងអតិផរណា។ លទ្ធភាពក្នុងការបង្កើនឬបន្ថយអាត្រាការប្រាក់គោល ឬចាក់បញ្ចូលសន្ទនាភាពទៅក្នុងសេដ្ឋកិច្ចបានប្រកបដោយប្រសិទ្ធភាព គឺអាស្រ័យទៅលើការប្រើប្រាស់ពេញលេញនឹងទូលំទូលាយនៃរូបិយវត្ថុជាតិ។

ក្នុងកម្មវិធីបើកសិក្ខាសាលាផ្សព្វផ្សាយសៀវភៅ«ដុល្លាររូបនីយកម្មនៅកម្ពុជា៖ ទំនាក់ទំនងផ្នែកគោលនយោបាយ ក្នុងការអភិវឌ្ឍវិស័យហិរញ្ញវត្ថុសម្រាប់ប្រទេសអភិវឌ្ឍន៍តិចតួច (LDCs)» ធ្វើឡើងកាលព្រឹកថ្ងៃទី១០ វិច្ឆកា ឆ្នាំ២០២៣ លោកជំទាវបណ្ឌិត ជា សិរី បានឱ្យដឹងថា ក្នុងរយៈពេលជាង២ទស្សវត្តន៍ចុងក្រោយនេះ ស្ថេរភាពម៉ាក្រូសេដ្ឋកិច្ច ជាពិសេសស្ថេភាពនយោបាយបានផ្ដល់ភាពអំណោយផល ដល់ការពង្រឹងការប្រើប្រាស់ប្រាក់រៀលជាលំដាប់ ខណៈដែលសមាមាត្រនៃការប្រើប្រាស់ដុល្លារអាមេរិកនៅតែមានកម្រិតខ្ពស់ បញ្ហានេះស្របទៅនឹងការរកឃើញនានារបស់អ្នកស្រាវជ្រាវ ដែលថា ពេលដុល្លាររូបនីយកម្មកើនឡើងដល់ចំណុចខ្ពស់មួយហើយ នឹងមិនងាយថយចុះវិញទេ។

លោកជំទាវ ក៏មើលឃើញការប្រែប្រួលលើទំនុកចិត្តប្រាក់រៀលនៅលើទីផ្សារហិរញ្ញវត្ថុ ក្នុងរយៈពេលប៉ុន្មានឆ្នាំចុងក្រោយនេះ ខណៈដែលសមាមាត្រនៃការប្រើប្រាស់ប្រាក់រៀលក្នុងរយៈពេល ២ទសវត្សន៍នេះ បានកើនពី ០,៨៥ទ្រីលានរៀល ដល់ ១៤,៥ទ្រីលានពោលគឺកើនឡើង ១៦ដង ដែលនេះបង្ហាញសញ្ញាណផ្លាស់ប្តូរជាវិជ្ជមានសម្រាប់ទំនុកចិត្តលើការប្រើប្រាស់រូបិយវត្ថុជាតិ៕