ភ្នំពេញ៖ ក្រុមហ៊ុនជប៉ុនចំនួន១៧ ក្នុងចំណោមក្រុមហ៊ុនជប៉ុនចំនួន២៦ ដែលធ្វើដំណើរបេសកកម្មធុរកិច្ចនៅកម្ពុជា បានបង្ហាញចំណាប់អារម្មណ៍ស្វែងរកឱកាសវិនិយោគនៅកម្ពុជាលើវិស័យមួយចំនួន ដូចជា វិស័យកសិកម្ម ការកែច្នៃម្ហូបអាហារ និងវិស័យវារីវប្បកម្មជាដើម។ នេះជាការលើកឡើងរបស់ឯកឧត្តម តាកាហាស៊ី ហ្វូមីអាគី ប្រធានសមាគមជប៉ុន-កម្ពុជា ក្នុងជំនួបជាមួយសម្តេចតេជោ ហ៊ុន សែន ប្រធានព្រឹទ្ធសភា។

ឯកឧត្តម តាកាហាស៊ី ហ្វូមីអាគី ក៏បានបញ្ជាក់អំពីកិច្ចសហប្រតិបត្តិការរបស់សមាគមជាមួយក្រសួងស្ថាប័នពាក់ព័ន្ធរបស់រាជរដ្ឋាភិបាលកម្ពុជា ក្នុងការបង្កើតសាលាបណ្ដុះបណ្ដាលជំនាញវិជ្ជាជីវៈ បានចំនួន៣ដែលរួមមាន សាលាបណ្ដុះបណ្ដាលជំនាញជួសជុលយានយន្ត, សាលាបណ្ដុះបណ្ដាលជំនាញតុបតែង និងថែសម្ផស្ស និងសាលាបណ្ដុះបណ្ដាលជំនាញវិស្វកម្មព័ត៌មានវិទ្យា។ ជាមួយគ្នានេះ ឯកឧត្តម តាកាហាស៊ី ហ្វូមីអាគី ក៏បានប្ដេជ្ញាចិត្តក្នុងការបន្តចូលរួមពង្រឹង និងពង្រីកកិច្ចសហប្រតិបត្តិការជាមួយរាជរដ្ឋាភិបាលកម្ពុជា លើវិស័យឧស្សាហកម្ម និងការអភិវឌ្ឍធនធានមនុស្ស ក៏ដូចជាការពង្រឹងនិងពង្រីកទំនាក់ទំនងអាជីវកម្ម និងធុរកិច្ចជាមួយវិស័យឯកជនកម្ពុជាផងដែរ។

គួរបញ្ជាក់ថា ក្រៅពីក្រុមហ៊ុនចំនួន២៦ខាងលើនេះ ក៏មានក្រុមហ៊ុនជប៉ុនមួយចំនួន ដែលបានវិនិយោគនៅកម្ពុជារួចហើយ មានដូចជា៖ ក្រុមហ៊ុនវិនិយោគលើឥណទានកាបោន, ក្រុមហ៊ុនចិញ្ចឹមត្រីយកសាច់, ភាគហ៊ុននៃក្រុមហ៊ុនប្រព័ន្ធទូរសព្ទ និងក្រុមហ៊ុនកែច្នៃផលិតផលចំណីអាហារកំប៉ុងជាដើម ដែលកំពុងដំណើរការ និងកំពុងរៀបចំពង្រីកផលិតកម្មរបស់ខ្លួនបន្ថែមទៀត ដើម្បីនាំផលិតផលទៅលក់នៅលើទីផ្សារជប៉ុន អឺរ៉ុប ស្វីស និងទីផ្សារពិភពលោកផងដែរ៕