ភ្នំពេញ៖ ធនាគារឯកទេស អ៊ីអន (ខេមបូឌា) ចង់ពង្រីកការវិនិយោគនៅកម្ពុជាបន្ថែមទៀត លើកិច្ចសហប្រតិបត្តិការទូទាត់ឆ្លងដែនរវាងកម្ពុជា-ជប៉ុន តាមរយៈប្រព័ន្ធបាគង របស់ធនាគារជាតិនៃកម្ពុជា។ នេះជាការលើកឡើងរបស់លោក Toshiya Shimakata ប្រធានក្រុមប្រឹក្សាភិបាលនៃធនាគារឯកទេស អ៊ីអន នាថ្ងៃទី២០ ខែវិច្ឆិកា ឆ្នាំ២០២៤។

ក្នុងជំនួបពិភាក្សាការងារនេះ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា ក៏បានលើកឡើងពីការចូលរួមរបស់ ធនាគារឯកទេស អ៊ីអន (ខេមបូឌា) ក្នុងសកម្មភាពសង្គមនាពេលកន្លងមក និងបានលើកទឹកចិត្តឱ្យធនាគារ អ៊ីអន បន្តចូលរួមកាន់តែច្រើនថែមទៀត ជាពិសេសកិច្ចសហការលើកកម្ពស់ចំណេះដឹងផ្នែកហិរញ្ញវត្ថុ។

ជាមួយគ្នានេះ លោកជំទាវបណ្ឌិត ជា សិរី ក៏បានបញ្ជាក់ពីសារសំខាន់នៃការស្វែងយល់ឱ្យបានច្បាស់លាស់អំពីបទប្បញ្ញត្តិនានា មុននឹងដាក់ឱ្យដំណើរការផលិតផល ឬសេវាកម្មថ្មីណាមួយ ព្រមទាំងបានលើកទឹកចិត្តឱ្យមានការពិភាក្សាគ្នាលម្អិតជាមួយមន្រ្តីជំនាញរបស់ ធនាគាជាតិនៃកម្ពុជា ដើម្បីធានាបានអនុលោមភាពពេញលេញផងដែរ៕