ភ្នំពេញ៖ ផ្សារមូលបត្រកម្ពុជា បានរៀបចំពិព័រណ៍ផ្សារភាគហ៊ុនកម្ពុជា «My First STOCK» ប្រចាំឆ្នាំ២០២៤ ដែលមានការចូលរួមយ៉ាងច្រើនកុះករពីសំណាក់ប្រជាពលរដ្ឋ ជាពិសេសស្រទាប់យុវជន។ ការតាំងពិព័រណ៍ផ្សារភាគហ៊ុននេះ ត្រូវបានរៀបចំឡើងរយៈពេល ៣ថ្ងៃ គឺចាប់ពីថ្ងៃទី២៥-២៧ ខែតុលា ឆ្នាំ២០២៤ នៅផ្សារទំនើប អ៊ីអនម៉ល ភ្នំពេញ ដែលមានការតាំងបង្ហាញពីស្ថាប័ន-ក្រុមហ៊ុនចំនួន ១៩។

ការរៀបចំពិព័រណ៍ផ្សារភាគហ៊ុនកម្ពុជានេះ ធ្វើឡើងដើម្បី លើកស្ទួយវិស័យមូលបត្រនៅកម្ពុជា តាមរយៈការផ្សព្វផ្សាយ និងការបញ្ជ្រាបការយល់ដឹងដល់សាធារណជន ជាពិសេសវិនិយោគិនសក្តានុពល ទាំងវិនិយោគិនជាតិ និងអន្តរជាតិឱ្យបានស្គាល់ និងយល់ដឹងបន្ថែមអំពីផ្សារមូលបត្រកម្ពុជា ក្នុងការសិក្សាស្វែងយល់ឱ្យកាន់តែច្បាស់អំពីវិស័យមូលបត្រ តាមរយៈជំនួបផ្ទាល់ជាមួយនិយ័តករ, ប្រតិបត្តិករទីផ្សារ, ក្រុមហ៊ុនមូលបត្រ, ក្រុមហ៊ុនបោះ ផ្សាយមូលបត្រ និងតួអង្គពាក់ព័ន្ធផ្សេងៗ៕