ភ្នំពេញ៖ រដ្ឋាភិបាល រកចំណូលពីការលក់សំបុត្រជូនភ្ញៀវអន្តរជាតិចូលទស្សនារមណីយដ្ឋានអង្គរបាន ៣០ ៣៣៤ ២២៩ដុល្លារ ក្នុងរយៈពេល ៨ខែ ឆ្នាំ២០២៤។ សេចក្តីប្រកាសព័ត៌មានរបស់គ្រឹះស្ថានអង្គរ បានបញ្ជាក់ថា ចំនួននេះមានការកើនឡើង ៣១,៣៦% ធៀបនឹងរយៈពេលដូចគ្នា ក្នុងឆ្នាំ២០២៣។

ក្នុងរយៈពេល ៨ខែ ចាប់ពីខែមករា ដល់ខែសីហា ឆ្នាំ២០២៤ មានភ្ញៀវអន្តរជាតិទិញបណ្ណចូលទស្សនារមណីយដ្ឋានអង្គរសរុបចំនួន ៦៥១ ៨៥៧នាក់ កើនឡើង ៣០,៧៦% ធៀបនឹងរយៈពេលដូចគ្នា ឆ្នាំ២០២៣។ ចំពោះ ការលក់បណ្ណនៅប្រាសាទកោះកែរ រយៈពេល ៨ខែសីហា មានចំនួន១៣ ១៧៤នាក់ ដែលបានថវិកាចំនួន ១៩៧ ៦១០ដុល្លារ និងការលក់សំបុត្រទូក រដ្ឋទទួលបានចំណូល ៥១៧ ៣០១ដុល្លារ ពីទូកសរុបចំនួន១៩ ៣២៧ ក្នុងនោះទូកតូចចំនួន ១៣ ៥៤៤ ទូកកណ្តាលចំនួន៥ ១៤៧ និងទូកធំចំនួន ៦៣៦។

ចំណែក ក្នុងខែសីហាវិញ គ្រឹះស្ថានអង្គរទទួលបានភ្ញៀវអន្តរជាតិចំនួន ៦៧ ៤៨២នាក់ កើនឡើង១៤,០៩% ខណៈដែលចំណូលទទួលបាន គឺ ៣ ១៥៦ ៧៩៩ដុល្លារ កើនឡើង១៣,៧៨% ធៀបនឹងខែសីហា ក្នុងឆ្នាំ២០២៣។ នេះបើតាមសេចក្តីប្រកាសព័ត៌មាន ស្តីពីស្ថិតិភ្ញៀវបរទេស និងចំណូលដែលទទួលបានពីការលក់បណ្ណចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្នៀស ប្រចាំខែសីហា ឆ្នាំ២០២៤៕