ភ្នំពេញ៖ អង្ករម៉ាកសមូហភាព SKO ដែលផលិតចេញពីពូជស្រូវសែនក្រអូប បានឈ្នះពានរង្វាន់មាស ក្នុងកម្មវិធីវាយតម្លៃគុណភាព រសជាតិ ប្រភេទអង្ករសគ្រាប់វែង ចិន-អាស៊ាន លើកទី១ កាលពីថ្ងៃទី២៨ ខែតុលា ឆ្នាំ២០២៣។

អង្ករពូជស្រូវសែនក្រអូម ដែលឈ្នះពានរង្វាន់មាសនេះ ស្ថិតក្នុងចំណោមអង្ករទាំង៦១ប្រភេទ ដែលក្នុងនោះមាន១២ប្រភេទ មកពីប្រទេសអាស៊ាន ហើយ ៥ប្រភេទ និង ៤៩ប្រភេទទៀតមកពីតំបន់ស្វយ័ត និងខេត្តដែលដាំដុះស្រូវរបស់ប្រទេសចិន។ អង្ករកម្ពុជា ដែលបានពានរង្វាន់មាសនេះ ត្រូវបានគណៈកម្មាធិការប្រកួតប្រជែងទទួលស្គាល់ថាជាពូជស្រូវល្អ និងមានរសជាតិឆ្ងាញ់។

ទន្ទឹមនឹងនេះ សហព័ន្ធស្រូវអង្ករកម្ពុជា អំពាវនាវដល់កសិករឱ្យបន្តយកចិត្តទុកដាក់ដាំដុះ និងថែទាំ ប្រកបដោយគុណភាព ដើម្បីទទួលបាននូវទិន្នផលកាន់តែល្អ ខណៈដែលការទទួលបានពានរង្វាន់មាសនេះ នឹងជួយឱ្យតម្លៃអង្ករសែនក្រអូបមានការទទួលស្គាល់កាន់តែច្រើន និងមានទីផ្សារកាន់តែធំ។

សូមជម្រាបផងដែរថា ពូជស្រូវសែនក្រអូប ជាប្រភេទពូជស្រូវមិនប្រកាន់រដូវ ដែលត្រូវបានប្រជាកសិកដាំដុះតាំងពីពាក់កណ្តាលទស្សវត្ស៩០មកម្ល៉េះ។ ពូជស្រូវនេះ បានប្រកាសដាក់ឱ្យប្រើប្រាស់ ជាផ្លូវការនៅឆ្នាំ២០១៩ ក្រោមឈ្មោះថា៖«សែនក្រអូប ០១»៕