សមិទ្ធផលថ្មីមួយនៅក្រុងកំពត គឺ«នាឡិកាដ៏ធំ» បន្ថែមពី«សេះសមុទ្រ» ដែលបានទាក់ទាញ និងលើកកម្ពស់វិស័យទេសចរណ៍នាខេត្តជាប់សមុទ្រមួយនេះ។ សម្តេចធិបតីនាយករដ្ឋមន្ត្រី ហ៊ុន ម៉ាណែត នៅថ្ងៃទី៣០ ខែសីហាឆ្នាំ២០២៤នេះ បានបង្ហោះសារជាសំណេរសរសើរដល់រដ្ឋបាលខេត្តកំពត ដែលបានខិតខំបង្កើតសមិទ្ធផលថ្មី ដែលរួមចំណែកក្នុងការលើកកម្ពស់ទេសចរណ៍ទាំងក្នុងស្រុក និងក្រៅស្រុក ហើយបន្ថែមជាជម្រើសសម្រាប់មហាជនទៅទស្សនាលេងកម្សាន្តផងដែរ។

ទន្ទឹមនឹង សម្តេចធិបតី ក៏បានជំរុញលើកទឹកចិត្តដល់ប្រជាពលរដ្ឋ ទៅលេងកម្សាន្តជាមួយនឹងសមិទ្ធផលថ្មីមួយនេះ ព្រមទាំងកន្លែងទេសចរណ៍ជាច្រើនទៀត ទៅទឹកដីខេត្តកំពត ក៏ដូចជាខេត្តជាប់សមុទ្រទាំងបួនរបស់កម្ពុជា។ នៅថ្ងៃទី៣០ ខែសីហា ដដែលនេះ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត ជាមួយថ្នាក់ដឹកនាំខេត្ត បានចុះពិនិត្យទីតាំងរូបសំណាកសេះសមុទ្រ និងបានពិភាក្សាគម្រោងរៀបចំហេដ្ឋារចនាសម្ព័ន្ធ ក្នុងខេត្តបន្ថែមទៀត ដើម្បីលើកស្ទួយវិស័យទេសចរណ៍ក្នុងខេត្ត ឱ្យកាន់តែរីកចម្រើន៕