ភ្នំពេញ៖ ក្រុមហ៊ុន Plug and Play LLC ដែលជាក្រុមហ៊ុនអភិវឌ្ឍន៍ធុរកិច្ចថ្មី និងនវានុវត្តន៍សកល ដែលមានមូលដ្ឋាននៅតំបន់ Silicon Valley នៃសហរដ្ឋអាម៉េរិក បង្ហាញឆន្ទៈពង្រីងកិច្ចសហប្រតិបត្តិការជាមួយក្រសួងប្រៃសណីយ៍ និងទូរគមនាគមន៍ ឱ្យកាន់តែប្រសើរបន្ថែមទៀតក្នុងការអភិវឌ្ឍធុរកិច្ច និងនវានុវត្តន៍។

តាមការចុះផ្សាយរបស់ក្រសួងប្រៃសណីយ៍ កាលពីថ្ងៃទី០៧ ខែមីនា ឆ្នាំ២០២៥ បច្ចុប្បន្ននេះ ក្រុមហ៊ុនមានដៃគូសហការជាមួយក្រុមហ៊ុនឯកជនជាង ៥៥០ក្រុមហ៊ុន និងកិច្ចសហប្រតិបត្តិការជាមួយរដ្ឋាភិបាលនិងស្ថាប័នសាធារណៈជាង ៥០ស្ថាប័ននៅលើពិភពលោក។ ក្រុមហ៊ុន Plug and Play មានធុរកិច្ចថ្មីប្រមាណ ៨០ ០០០ ក្នុងបណ្តាញរបស់ខ្លួន ព្រមទាំងបានវិនិយោគលើធុរកិច្ចថ្មីចំនួន ១ ៦០០ និងបន្តវិនិយោគលើធុរកិច្ចថ្មីចំនួន ២៥០ បន្ថែមជារៀងរាល់ឆ្នាំ។

ក្នុងជំនួបជាមួយឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ លោក Jojo Flores សហស្ថាបនិកក្រុមហ៊ុន Plug and Play LLC បានសរសើរពីសមិទ្ធផលនានារបស់ក្រសួង ជាពិសេសការបណ្តុះបណ្តាលធនធានមនុស្ស និងការជួយជ្រោមជ្រែងធុរៈកិច្ចថ្មី ដែលនឹងក្លាយជាកាតាលីករជំរុញកំណើនសេដ្ឋកិច្ចនៅកម្ពុជា៕