ភ្នំពេញ៖ សម្តេចធិបតី ហ៊ុន ម៉ាណែត បានថ្លែងនៅក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងធនធានទឹក និងឧតុនិយម ថា នៅដើមអាណត្តិទី៧នេះ រាជរដ្ឋាភិបាលបានសម្រេចអនុម័តនូវគម្រោងមួយដែលចំណាយថវិកាជាង ៣០០លានដុល្លារ ដើម្បីដោះស្រាយបញ្ហាទឹកលិចភ្នំពេញ។

ក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ នេះ សម្តេចធិបតី ហ៊ុន ម៉ាណែត បានលើកឡើងថា៖«ទាក់ទងទៅនឹងការដោះស្រាយបញ្ហាទឹកលិច នៅតាមបណ្តាទីប្រជុំជនធំៗមួយចំនួននៅដើមអាណត្តិនេះ ខ្ញុំបានដាក់ចេញនូវគោលការណ៍ និងរៀបចំផែនការមួយចំនួន ដែលក្នុងនោះនៅក្នុងរាជធានីភ្នំពេញ ខ្ញុំបានអនុម័តនូវគម្រោងមួយ ដើម្បីខិតខំធ្វើយ៉ាងណាដោះស្រាយបញ្ហាទឹកជំនន់នៅភ្នំពេញ»។

សម្តេចធិបតីនាយករដ្ឋមន្ត្រី បានបន្តថា គម្រោងមួយនេះ គឺផ្តោតទៅលើមុខព្រួញ២ ដែលមុខព្រួញទី១ គឺការបញ្ចៀសទឹកកុំឱ្យបុកមកក្នុងរាជធានីភ្នំពេញ គឺមានក្រសួងធនធានទឹក និងឧត្តុនិយមជាអ្នកអនុវត្តន៍កិច្ចការនេះ ដែលខិតខំធ្វើយ៉ាងណាបណ្តោះទឹកឱ្យបានច្រើន និងកុំឱ្យទឹកធ្លាក់ខ្លាំងទៅលើស្ទឹងព្រែកត្នោត។

ចំពោះមុខព្រួញទី២ ដោះស្រាយប្រព័ន្ធរំដោះទឹកនៅក្នុងរាជធានីភ្នំពេញដែលមានស្រាប់ ស្ថាប័នទទួលខុសត្រូវ គឺក្រសួងសាធារណការ និងដឹកជញ្ជូន មន្ទីរសាធារណការ និងសាលារាជធានីភ្នំពេញ ហើយកិច្ចការនេះនឹងផ្តោតលើការកាយប្រឡាយរំដោះទឹក រៀបចំស្តារដាក់លូថ្មី និងរៀបចំបង្កើតស្ថានីយបូមទឹក។ សម្តេចធិបតី ហ៊ុន ម៉ាណែត បានបញ្ជាក់ថា ផែនការនេះ គឺកំពុងតែចាប់ផ្តើមជាបណ្តើរៗហើយ ដែលមកដល់ពេលនេះមន្ត្រីជំនាញកំពុងសិក្សាលើផលប៉ះពាល់ផងដែរ៕