ភ្នំពេញ៖ ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ឆ្នាំសិក្សា២០២៣-២០២៤ នឹងប្រព្រឹត្តទៅរយៈពេល ២ថ្ងៃ គឺថ្ងៃ៨ និងទី៩ ខែតុលា ឆ្នាំ២០២៤។ ដើម្បីរួមចំណែកឱ្យដំណើរការប្រឡងប្រព្រឹត្តដោយរលូន រដ្ឋបាលរាជធានីភ្នំពេញ ហាមប្រាមអាជីវករដែលប្រកបអាជីវកម្មជុំវិញបរិវេណមណ្ឌលប្រឡងផ្អាកជាបណ្តោះអាសន្ន រយៈពេល ២ថ្ងៃ។

អាជីវកម្មដែលត្រូវផ្អាកដំណើរការបណ្តោះអាសន្ន រួមមាន៖ អាជីវកម្មថតចម្លងឯកសារ អ៊ិនធឺណិត អាជីវកម្មលក់សម្ភារសិក្សា ភោជនីយដ្ឋាន អាហារដ្ឋាន និងការដ្ឋានសំណង់នានា។ ចំពោះទីតាំងអាជីវកម្មផ្សេងទៀត ដែលស្ថិតនៅជិតបរិវេណមណ្ឌលប្រឡង ហាមបង្កសំឡេងរំខាន ឬសកម្មភាពនានា ដែលធ្វើឱ្យប៉ះពាល់ដល់ដំណើរការប្រឡងរបស់បេក្ខជន ខណៈដែលការផ្ញើទោចក្រយាន ទោចក្រយានយន្ត (កង់-ម៉ូតូ) នៅតាមមណ្ឌលប្រឡង គឺមិនត្រូវបានបង់ប្រាក់ឡើយ។

ពាក់ព័ន្ធនឹងការរក្សាសណ្តាប់ធ្នាប់ក្នុងពេលប្រឡងបាក់ឌុបនេះ រដ្ឋបាលរាជធានីភ្នំពេញ បានអំពាវនាវឱ្យ អាជីវករទាំងអស់ជ្រាប យោគយល់ និងអនុវត្តដូចខាងលើ។ តាមសេចក្តីជូនដំណឹងរបស់រដ្ឋបាលរាជធានីភ្នំពេញ ដែលចុះផ្សាយកាលពីថ្ងៃទី៤ ខែតុលា បញ្ជាក់ថា ក្រោយផុតរយៈពេលនៃការប្រឡងបាក់ឌុប អាជីវករទាំងអស់អាចបើកដំណើរការអាជីវកម្មជាធម្មតាឡើងវិញ៕