ភ្នំពេញ៖ ផ្សារទំនើបម៉ាក្រូ នឹងរៀបចំតាំងពិព័រណ៍ផលិតផលខ្មែរ ដូចជាគ្រឿងទេស របស់ប្រើប្រាស់ប្រចាំថ្ងៃ បន្លែនិងផ្លែឈើស្រស់ ទឹកដោះគោ អង្ករនិងវត្ថុអនុស្សាវរីយ៍ រយៈពេល ២សប្តាហ៍ ក្នុងគោលបំណងបង្កើនប្រាក់ចំណូលដល់កសិករខ្មែរ។ ការតាំងពិព័រណ៍ដែលធ្វើឡើងក្នុងទិសដៅគាំទ្រ និងលើកស្ទួយដល់ផលិតផលខ្មែរនេះ នឹងរៀបចំចាប់ពីថ្ងៃទី១៦ រហូតដល់ថ្ងៃទី៣១ ខែកក្កដា ឆ្នាំ២០២៤ នៅ ៣ទីតាំងផ្សេងគ្នា។

៣ទីតាំងផ្សេងគ្នា ដែលនឹងមានការតាំងពិព័រណ៍ផលិតផលខ្មែរ មាននៅផ្សារទំនើបម៉ាក្រូ សែនសុខ, ផ្សារទំនើបម៉ាក្រូ សៀមរាប និងផ្សារទំនើបម៉ាក្រូ ជ្រោយចង្វារ។ ការតាំងពិព័រណ៍ ក្រោមកិច្ចគាំទ្រដោយ សហគ្រិនខ្មែរ និងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នឹងដាក់តាំងបង្ហាញនូវផលិតផលខ្មែរដែលផលិតស្របតាមស្ដង់ដារសុវត្ថិភាពចំណីអាហារ និងប្រកបដោយគុណភាពល្អ សុវត្ថិភាព តម្លៃសមរម្យ។ សហគ្រិនខ្មែរ បានអំពាវនាវឱ្យអតិថិជនចូលរួមឱ្យបានច្រើន ដើម្បីគាំទ្រអាជីវកម្មក្នុងស្រុក។ តាមការចុះផ្សាយរបស់សហគ្រិនខ្មែរ នាថ្ងៃទី១៦ ខែកក្កដា ឆ្នាំ២០២៤ ក្នុងការតាំងពិព័រណ៍នេះ អតិថិជននឹងមានជម្រើសកាន់តែច្រើនសម្រាប់ទិញជាមួយនឹងការបញ្ចុះតម្លៃ និងឱកាសឈ្នះរង្វាន់ផងដែរ៕