ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានស្នើឱ្យវិស័យឯកជនរបស់សហរដ្ឋអាម៉េរិកចំនួន ៣ស្ថាប័ន ពិនិត្យលទ្ធភាពបណ្តាក់ទុនវិនិយោគនៅកម្ពុជា លើវិស័យថាមពល សុខាភិបាល និងពាណិជ្ជកម្មអេឡិចត្រូនិក ដោយដាក់លក់ផលិតផលកម្ពុជានៅលើថ្នាលពាណិជ្ជកម្មតាមប្រព័ន្ធអេឡិចត្រូនិក (E-Commerce)។

ក្នុងជំនួប កាលពីថ្ងៃទី០១ ខែតុលា ឆ្នាំ២០២៤ ឯកឧត្តម ស៊ុន ចាន់ថុល បានផ្សព្វផ្សាយនិងពន្យល់លម្អិតអំពីបរិយាកាសវិនិយោគនៅកម្ពុជា កញ្ចប់លើកទឹកចិត្តនានា ផ្តល់ព័ត៌មានសំខាន់ៗ និងកិច្ចសម្របសម្រួលវិនិយោគពីក្រុមប្រឹក្សាអភិវឌ្ឍន៍កម្ពុជាដល់វិស័យឯកជនទាំង៣ ដែលមានមុខសញ្ញាវិនិយោគក្នុងវិស័យថាមពល ពាណិជ្ជកម្មអេឡិចត្រូនិក និងសុខាភិបាល។ នេះបើតាមការចុះផ្សាយរបស់ CDC នាថ្ងៃទី០៤ ខែតុលា ឆ្នាំ២០២៤៕