ភ្នំពេញ៖ ក្រសួងសុខាភិបាល អំពាវនាវឱ្យប្រជាពលរដ្ឋប្រុងប្រយ័ត្នចំពោះជំងឺផ្តាសាយបក្សី H5N1 ក្រោយរកឃើញករណីវិជ្ជមានជំងឺផ្តាសាយបក្សីប្រភេទនេះ ១ករណីទៀតលើក្មេងប្រុសអាយុ៤ឆ្នាំ ដែលមានទីលំនៅភូមិជ្រុងពពេល ឃុំម្រាម ស្រុករមាសហែក ខេត្តស្វាយរៀង។ ការអំពាវនាវនេះ បានធ្វើឡើងកាលពីថ្ងៃទី២ ខែសីហា ឆ្នាំ២០២៤។

បើតាមការចេញផ្សាយរបស់ក្រសួងសុខាភិបាល ក្មេងប្រុសដែលមានជំងឺផ្តាសាយបក្សី មានអាការៈគ្រុនក្តៅ ក្អក ហត់ ពិបាកដកដង្ហើម នឹងសន្លឹម ប៉ុន្តែបច្ចុប្បន្នមានស្ថានភាពធូរស្រាល និងកំពុងទទួលបានការថែទាំយ៉ាងយកចិត្តទុកដាក់ពីសំណាក់ក្រុមគ្រូពេទ្យ។ មូលហេតុនៃការឆ្លងនេះ គឺប្រហែល១២ថ្ងៃមុនចាប់ផ្តើមឈឺ ផ្ទះអ្នកជំងឺបានយកមាន់ទាងាប់ក្នុងភូមិយកធ្វើម្ហូបបរិភោគ និងអ្នកជំងឺបានប៉ះពាល់និងកាន់មាន់ងាប់នោះផងដែរ។ ករណីវិជ្ជមានវីរុសផ្តាសាយបក្សីប្រភេទ H5N1 លើក្មេងប្រុសនេះ ត្រូវបានបញ្ជាក់ពីវិទ្យាស្ថានជាតិសុខាភិបាលសាធារណៈ និងវិទ្យាស្ថានប៉ាស្ទ័រ កាលពីថ្ងៃទី៣០ ខែកក្កដា។

សេចក្តីប្រកាសព័ត៌មានរបស់ក្រសួងសុខាភិបាល បញ្ជាក់ថា H5N1 នៅតែបន្តគំរាមកំហែងដល់សុខភាពពលរដ្ឋ ដូច្នេះប្រសិនបើមានអាការៈក្តៅខ្លួន ក្អក ហៀរសំបោរ ឬពិបាកដកដង្ហើម និងមានប្រវត្តិធ្លាប់បានប៉ះពាល់ជាមួយមាន់ទាឈឺ ឬស្លាប់ក្នុងអំឡុង១៤ថ្ងៃ មុនថ្ងៃចាប់ផ្តើមមានរោគសញ្ញា ត្រូវកុំជួបជុំនៅទីប្រជុំជន និងត្រូវស្វែងរកការពិនិត្យព្យាបាលនៅតាមមូលដ្ឋានសុខាភិបាលឱ្យទាន់ពេលវេលា។

ជំងឺផ្តាសាយបក្សី H5N1 គឺជាជំងឺផ្តាសាយមួយដែលចម្លងរវាងសត្វបក្សីឈឺទៅបក្សីផ្សេងទៀត ប៉ុន្តែវាក៏អាចចម្លងពីបក្សីទៅមនុស្សតាមការប៉ះពាល់ជិតស្និទ្ធជាមួយបក្សីដែលឈឺឬងាប់ផងដែរ ហើយជំងឺផ្តាសាយបក្សីលើមនុស្សជាជំងឺធ្ងន់ធ្ងរ ដែលតម្រូវឱ្យមានការព្យាបាលនៅមន្ទីរពេទ្យទាន់ពេលវេលា។ ចំពោះវិធានការបង្ការវិញ គឺត្រូវលាងដៃឱ្យបានញឹកញាប់ជាមួយសាប៊ូ និងទឹកមុនពេលបរិភោគ និងបន្ទាប់ពីប៉ះពាល់ជាមួយបក្សី។ លើសពីនេះ ត្រូវមើលកុមារឱ្យនៅឆ្ងាយពីបក្សី ដាក់សត្វបក្សីឱ្យឆ្ងាយពីកន្លែងរស់នៅ និងកុំបរិភោគសត្វបក្សីឈឺឬងាប់ និងរាល់សត្វបក្សីដែលធ្វើសម្រាប់បរិភោគត្រូវចម្អិនឱ្យឆ្អិនល្អ៕