ភ្នំពេញ៖ ក្រសួងសុខាភិបាល នឹងចាត់វិធានការតាមផ្លូវច្បាប់ចំពោះជនដែលចែកចាយ ឬលក់ឧបករណ៍បរិក្ខារពេទ្យគ្មានលេខបញ្ជីកាពីក្រសួងសុខាភិបាល ឈ្មោះ Neoplast-S។ បើតាមក្រសួងសុខាភិបាល ចុះផ្សាយនាថ្ងៃទី៣១ ខែកក្កដា ឆ្នាំ២០២៤ ឧបករណ៍បរិក្ខារពេទ្យ Neoplast-S គឺមិនមានគុណភាព សុវត្ថិភាព និងប្រសិទ្ធភាព និងអាចនាំឱ្យប៉ះពាល់ដល់សុខភាពនិងអាយុជីវិតអ្នកប្រើប្រាស់ទៀតផង។

ឧបករណ៍បរិក្ខារពេទ្យ Neoplast-S គឺកំពុងចរាចរលើទីផ្សារកម្ពុជា និងមានលក្ខណៈស្រដៀងនឹងឧបករណ៍បរិក្ខារពេទ្យដែលកំពុងចែកចាយដោយក្រុមហ៊ុន DKSH (Cambodia) Ltd។ ពាក់ព័ន្ធនឹងករណីនេះ ក្រសួងសុខាភិបាល តម្រូវឱ្យបុគ្គលដែលចែកចាយនិងអ្នកពាក់ព័ន្ធ បញ្ឈប់ការនាំចូល ចែកចាយ ឬលក់ឧបករណ៍បរិក្ខារពេទ្យគ្មានលេខបញ្ជីកាឈ្មោះ Neoplast-S នេះជាបន្ទាន់។

ចំពោះឧបករណ៍បរិក្ខារពេទ្យ ដែលមានលេខបញ្ជីកាត្រឹមត្រូវ គឺមានទំហំប្រអប់១៤.៧ x ៨.៤ x ៤ស.ម, លតាបត្រ មានពណ៌សខ្មៅ(បែបថ្មី), ប្រអប់មានពណ៌ទឹកក្រូចរលោង, លេខបាកូដ ៨៨៥៩៧៧៤១០០៦៨១,របៀបប្រើប្រាស់ មានដាក់ជារូបភាពណែនាំ, ការរចនាផ្នែកខាងក្រោម/ភាសា ខាងក្រោយពណ៌សនិងបកប្រែជាភាសាខ្មែរ, ចំណុះនៅក្នុងប្រអប់ មាន១០០ សន្លឹក និងផ្ទៃប្រអប់ខាងក្នុងពណ៌ប្រផះ។

ចំណែកឧបករណ៍បរិក្ខារពេទ្យ ដែលគ្មានលេខបញ្ជីកាពីក្រសួងសុខាភិបាល និងមិនស្គាល់អត្តសញ្ញាណនោះ មានទំហំ ១៤.៨ x ៨.៤ x ៤.៥ស.ម, គ្មានបិទលតាបត្រ, ប្រអប់ពណ៌ក្រហម, លេខបាកូដ ៨៨៥០៣០៤០៩៦៦៤១, របៀបប្រើប្រាស់ មិនមានរូបភាពណែនាំ, ការរចនាផ្នែកខាងក្រោម/ភាសា ផ្ទៃខាងក្រោយពណ៌ស និងមានសរសេរជាភាសាថៃ, ចំណុះនៅក្នុងប្រអប់ មាន១០០+៨សន្លឹក និងផ្ទៃប្រអប់ខាងក្នុងពណ៌ស។

តាមអនុលោមតាមច្បាប់ ស្តីពីការគ្រប់គ្រងឱសថ និងច្បាប់ស្តីពីវិសោធនកម្មច្បាប់ ស្តីពីការគ្រប់គ្រងឱសថតម្រូវឱ្យរាល់ការចរាចរឱសថ និងផលិតផលដែលមានគុណភាពក្នុងការបង្ការ ឬព្យាបាលជំងឺគ្រប់ប្រភេទនៅកម្ពុជា ត្រូវមានលេខបញ្ជីកាពីក្រសួងសុខាភិបាល។ ដូច្នេះ ប្រជាពលរដ្ឋត្រូវពិនិត្យមុនលើលតាបត្របញ្ជីកា ដែលមានបិទលើសំបកវេចខ្ចប់ គឺផ្នែកខាងលើមានឈ្មោះក្រុមហ៊ុន និងផ្នែកខាងក្រោមមានលេខបញ្ជីកា៕