ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងអង្គការ Helen Keller អន្តរជាតិ ពិភាក្សាការពង្រឹងកិច្ចសហប្រតិបត្តិការផ្នែកស្តង់ដា​អាហារូបត្ថម្ភ សុវត្ថិភាពម្ហូបអាហារ និងការអភិវឌ្ឍប្រព័ន្ធស្បៀងអាហាររបស់កម្ពុជា ពិសេសពិភាក្សាពីការរួមចំណែករបស់អង្គការ Helen Keller អន្តរជាតិ ក្នុងការអភិវឌ្ឍស្តង់ដាកម្ពុជា រួមទាំងការរៀបចំសេចក្តីព្រាងស្តង់ដាផលិតផលអាហារូបត្ថម្ភសម្រាប់​កុមារ​អាយុពី៦ ទៅ ៣៦ខែ។

ក្នុងជំនួបនេះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម បានបញ្ជក់ថា កម្ពុជាអនុម័តស្តង់ដាជាតិបានជាង ១ពាន់ស្តង់ដា ដែលជាចំនួន​តិចនៅឡើយ បើធៀបនឹងស្តង់ដាអន្តរជាតិ ក្នុងនោះ ក្រសួងបានប្រើអភិក្រមជាក់ស្តែងនិយម ដោយអនុម័តយកស្តង់ដាអន្តរជាតិដូចជា ISO និង Codex ជាស្តង់ដាជាតិ ក្នុងករណីសមស្រប ទន្ទឹមនឹងនោះផ្តល់អាទិភាព​ដល់ការអនុវត្តស្តង់ដាដោយឧស្សាហកម្មក្នុងស្រុក។

លោកបណ្ឌិត Shawn Baker បានលើកឡើងថា ការពង្រឹងស្តង់ដា និងអនុលោមភាព នឹងជួយសម្របសម្រួលតួអង្គសំខាន់ៗក្នុងខ្សែច្រវាក់តម្លៃ​ស្បៀង​អាហារ រាប់ចាប់តាំងពីកសិករ រហូតដល់អ្នកកែច្នៃ និងក្រុមហ៊ុនផលិត។ ចំពោះ ការធានាស្តង់ដា អាចត្រូវបានយកទៅអនុវត្តជាក់ស្តែង និងប្រកប​ដោយ​​ប្រសិទ្ធ​ភាពជារឿងសំខាន់ ដើម្បីធានាការផ្គត់ផ្គង់ទូលំទូលាយនូវផលិតផលអាហារដែលមានអាហារូបត្ថម្ភខ្ពស់ និងគាំទ្រដល់អ្នកផលិតក្នុងស្រុក។

ជាមួយគ្នានេះ ឯកឧត្តម ហែម វណ្ណឌី បានស្វាគមន៍ចំពោះសំណើរបស់អង្គការ Helen Keller អន្តរជាតិ ក្នុងការស្វែងរកយន្តកាគាំទ្រសហគ្រាស​ផលិតផលិតផល​ដែលមានអាហារូបត្ថម្ភ​ខ្ពស់ ឱ្យទទួលបានហិរញ្ញប្បទាន និង​ការ​លើកទឹកចិត្តនានា៕