ភ្នំពេញ៖ កម្ពុជា សម្រេចបានការនាំចូល និងនាំចេញបាន ៥០,៤៥ពាន់លានដុល្លារ កើនឡើងជិត ១៦%ក្នុងរយៈពេល ១១ខែ នៃឆ្នាំ២០២៤។ ក្រសួងពាណិជ្ជកម្ម បានឱ្យដឹងថា ទំហំពាណិជ្ជកម្មដែលសម្រេចបានជាង ៥០ពាន់លានដុល្លារនេះ មានការនាំចេញ ២៤,៣៤ពាន់លានដុល្លារ កើនឡើង ១៤,៣៦% និងនាំចូលសម្រេចបាន ២៦,១០ពាន់លានដុល្លារ កើនឡើង ១៧,៤៨% បើធៀបក្នុងរយៈពេលដូចគ្នាឆ្នាំ២០២៣។

ចំពោះ ការនាំចេញដែលកម្ពុជាសម្រេចបានជាង ២៤ពាន់លានដុល្លារនេះ មានមុខទំនិញសំខាន់ៗ រួមមាន៖ សម្លៀកបំពាក់ ៨,៩៤ពាន់លានដុល្លារ កើនឡើង ២៥,៨៤%, សម្ភារធ្វើដំណើរ ១,៧៨ពាន់លានដុល្លារ កើនឡើង ២១,៥០%, ស្បែកជើង ១,៥០ពាន់លានដុល្លារ កើនឡើង ២៤,៣០% និងស្រូវទទួលបាន ១,៥០ពាន់លានដុល្លារ កើនឡើង១៦,៤២%។

សម្រាប់ការនាំចូលមានទំនិញសំខាន់ៗ ដូចជា៖ វាយនភ័ណ្ឌ ៥,៧០ពាន់លានដុល្លារ កើនឡើង ២៣,៥២%, គ្រឿងអេឡិចត្រូនិក ៣,៣២ពាន់លានដុល្លារ កើនឡើង ២៩,១៤%, សម្ភារសំណង់ ១,៤៧ពាន់លានដុល្លារ កើនឡើង ២២,៣៥%, ប្រេងម៉ាស៊ូត ១,៣០ពាន់លានដុល្លារ កើនឡើង ១០,១៦% និងរថយន្ត ៩០៧,៧៩លានដុល្លារ កើនឡើងបាន ៧,២១%៕