លោកបណ្ឌិត ឃុន ចាន់ថា ប្រធានក្រុមប្រឹក្សាភិបាល ថ្នាក់ដឹកនាំ ព្រមទាំងបុគ្គលិកគ្រប់ផ្នែកទាំងអស់ នៃអង្គភាពសារព័ត៌មាន SME បានអញ្ជើញនាំយកនូវភត្តាហារ និងទេយ្យវត្ថុទៅវេរប្រគេនព្រះភិក្ខុសង្ឃដែលគង់ចាំព្រះវស្សាក្នុងវត្តអង្គពោធិញាណ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ, ពិធីបុណ្យកាន់បិណ្ឌវេនទី២នេះ ប្រាព្ធធ្វើឡើងនៅ ថ្ងៃព្រហស្បតិ៍ ២រោច ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៩ ខែកញ្ញា ឆ្នាំ២០២៤។

ក្នុងនាមពុទ្ធសាសនិក លោកបណ្ឌិត តែងតែឆ្លៀតពេលវេលាដ៏មមាញឹក ដឹកនាំក្រុមការងារក្រោមឱវាទឱ្យគោរពប្រតិបត្តិទៅតាមគន្លងនៃព្រះពុទ្ធសាសនាដ៏ផូរផង់របស់ជាតិខ្មែរយើង។ ឆ្លៀតក្នុងឱកាសកាន់វេនទី២នេះផងដែរ ដោយអំណាចបុណ្យកាន់បិណ្ឌ និងភ្ជុំបិណ្ឌនេះ សូមពុកម៉ែ បងប្អូនប្រុសស្រីទាំងអស់ ជួបប្រទះនូវពុទ្ធពរទាំងឡាយ៤ប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕