ភ្នំពេញ៖ បច្ចេកវិទ្យាហិរញ្ញវត្ថុនៅកម្ពុជា មាន២ប្រភេទ គឺបច្ចេកវិទ្យាហិរញ្ញវត្ថុក្នុងវិស័យធនាគារ និងបច្ចេកវិទ្យាហិរញ្ញវត្ថុក្នុងវិស័យហិរញ្ញវត្ថុមិនមែនធនាគារ។ នេះបើតាមកម្ពុជាឆ្ពោះទៅឌីជីថល បានឱ្យដឹងកាលពីថ្ងៃទី១៤ ខែកញ្ញា ឆ្នាំ២០២៤។

ចំពោះបច្ចេកវិទ្យាហិរញ្ញវត្ថុក្នុងវិស័យធនាគារ គឺជាបច្ចេកវិទ្យាហិរញ្ញវត្ថុដែលស្ថិតនៅក្រោមសមត្ថកិច្ចរបស់ធនាគារជាតិនៃកម្ពុជា ដែលរួមមានជាការទូទាត់សងប្រាក់ឌីជីថល, ការសន្សំប្រាក់ឌីជីថល និងការផ្ទេរប្រាក់ឌីជីថល។

បច្ចេកវិទ្យាហិរញ្ញវត្ថុក្នុងវិស័យហិរញ្ញវត្ថុមិនមែនធនាគារ គឺជាបច្ចេកវិទ្យាហិរញ្ញវត្ថុស្ថិតនៅក្រោមសមត្ថកិច្ចរបស់អាជ្ញាធរសេវាហិរញ្ញវត្ថុមិនមែនធនាគារ(អ.ស.ហ) ដែលមាននិយ័តករក្រោមឱវាទចំនួន៦ និងមជ្ឈមណ្ឌលបច្ចេកវិទ្យាហិរញ្ញវត្ថុជាសេនាធិកា រួមមាន៖ បច្ចេកវិទ្យាហរិញ្ញវត្ថុក្នុងវិស័យធានារ៉ាប់រង (បច្ចេកវិទ្យាធានារ៉ាប់រង), បច្ចេកវិទ្យាហិរញ្ញវត្ថុក្នុងវិស័យមូលបត្រ, បច្ចេកវិទ្យាហិរញ្ញវត្ថុក្នុងវិស័យសន្តិសុខសង្គម, បច្ចេកវិទ្យាហិរញ្ញវត្ថុក្នុងវិស័យបរធនបាលកិច្ច, បច្ចេកវិទ្យាហិរញ្ញវត្ថុក្នុងវិស័យគណនេយ្យនិងសវនកម្ម និងបច្ចេកវិទ្យាហិរញ្ញវត្ថុក្នុងវិស័យអចលនវត្ថុនិងបញ្ចាំ និងបច្ចេកវិទ្យាហិរញ្ញវត្ថុផ្សេងទៀត៕