ភ្នំពេញ៖ រាជរដ្ឋាភិបាល បានចេញគោលការណ៍រៀបចំដំណើរកម្សាន្តដោយឥតគិតថ្លៃ ដល់ប្រជាពលរដ្ឋដែលមានបំណងទៅលេងខេត្ដទាំង៤ នៅជាប់តំបន់ព្រំដែនអភិវឌ្ឍន៍CLV-DTA រៀងរាល់ចុងសប្ដាហ៍ ចាប់ផ្ដើមអនុវត្តពីខែកញ្ញា រហូតដល់ចុងឆ្នាំ២០២៤។ នេះបើតាមការលើកឡើងរបស់សម្តេចធិបតី ហ៊ុន ម៉ាណែត ក្នុងពិធីថ្លែងការណ៍ពិសេសស្តីពីសមិទ្ធផល១ឆ្នាំរបស់រាជរដ្ឋាភិបាលនីតិកាលទី៧ នៃរដ្ឋសភា។

សម្តេចធិបតី ហ៊ុន ម៉ាណែត បានថ្លែងនៅថ្ងៃទី២២ សីហា ថា ការរៀបចំដំណើរកម្សាន្តដោយឥតគិតថ្លៃនេះ ដើម្បីឱ្យប្រជាពលរដ្ឋ ពិសេសយុវជនបានទៅដល់ខេត្តដែលនៅជាប់តំបន់ព្រំដែនអភិវឌ្ឍន៍CLV-DTA និងឃើញទិដ្ឋភាពជាក់ស្ដែងនៅតាមផ្លូវព្រំដែន ការអភិវឌ្ឍព្រំដែនរបស់កម្ពុជា ក៏ដូចជាការអភិវឌ្ឍរបស់ប្រជាជននៅក្នុងខេត្តទាំងនោះ ដូចជា៖ ក្រចេះ ស្ទឹងត្រែង មណ្ឌលគិរី និងរតនគិរី។

សម្តេចធិបតីនាយករដ្ឋមន្ត្រី បានបន្តថា៖ «ការរៀបចំដំណើរកម្សាន្តនេះ គឺប្រគល់ភារកិច្ចដល់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ដើម្បីរៀបចំនិងដាក់ចេញជាព័ត៌មានលម្អិតអំពីការចុះឈ្មោះ និងពេលវេលាអនុវត្តកិច្ចការងារ»។ បន្ថែមលើដំណើរកម្សាន្តនេះ សម្ដេចធិបតី ហ៊ុន ម៉ាណែត ក៏បានប្រគល់ភារកិច្ចជូនលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី ប្រធានគណៈកម្មការគោលនយោបាយសេដ្ឋកិច្ចនិងហិរញ្ញវត្ថុ រៀបចំកញ្ចប់លើកទឹកចិត្តជំរុញការវិនិយោគនៅភូមិភាគឦសានសម្រាប់ឆ្នាំ២០២៥ ហើយរៀបចំឱ្យបានចប់សព្វគ្រប់នៅមុនឆ្នាំ២០២៤៕