ភ្នំពេញ៖ ក្រសួងសុខាភិបាល បានចុះត្រួតពិនិត្យការរៀបចំទីតាំងផ្នែកចត្តាឡីស័កនៅអាកាសយានដ្ឋានអន្តរជាតិភ្នំពេញ នាថ្ងៃទី២៧ ខែសីហា ឆ្នាំ២០២៤ ដើម្បីទប់ស្កាត់ការនាំចូលជំងឺអឹមផក (Mpox clade1.B) ឬជំងឺអុតស្វាចូលមកកម្ពុជា នៅតាមច្រកទាំងអស់ និងវិធានការការពារដល់អ្នកដំណើរ។

ក្នុងការចុះត្រួតពិនិត្យនេះ ក្រសួងសុខាភិបាល នឹងពង្រឹងយន្តការបន្ថែមទៀត ក្នុងការតាមដានកម្តៅដោយប្រព័ន្ធកាមេរ៉ា និងការអង្កេត តាមដានរាល់អ្នកដំណើរដែលបានធ្វើដំណើរគ្រប់ច្រកចេញចូលទាំងអស់។ បើតាមការចុះផ្សាយរបស់ក្រសួងសុខាភិបាល នាថ្ងៃទី២៨ សីហា ក្នុងករណីមានការសង្ស័យថាអ្នកដំណើរកើតជំងឺអុតស្វា មន្ត្រីចត្តាទ្បីស័ករបស់ក្រសួងសុខាភិបាល នឹងចាត់ចែងអនុវត្តតាមគោលការណ៍ណែនាំក្នុងការទប់ស្កាត់នឹងឆ្លើយតបទៅនឹងការរាតត្បាតនៃជំងឺឆ្លងជាបន្ទាន់។

ការចុះត្រួតពិនិត្យរៀបចំទីតាំងផ្នែកចត្តាឡីស័កនៅអាកាសយានដ្ឋានអន្តរជាតិភ្នំពេញនេះ ក្រសួងសុខាភិបាល និងក្រុមការងារ បានឯកភាពបន្ថែមម៉ាស៊ីនស្កែនកម្តៅ នឹងរៀបចំតំទ្បើងរូបភាព សារជាវីដេអូសំខាន់ៗ ជាសារអប់រំ និងវិធានការនានា ដល់អ្នកដំណើរស្តីពីជំងឺអឹមផក(Mpox)៕