ភ្នំពេញ៖ គិតត្រឹមដើមឆ្នាំ២០២៤នេះ មានធុរជន និងវិនិយោគិនវៀតណាមចំនួន ៥០ក្រុមហ៊ុន កំពុងធ្វើប្រតិបត្តិការធុរកិច្ច និងវិនិយោគលើវិស័យផ្សេងៗ នៅកម្ពុជា ក្នុងនោះក៏មានសកម្មភាពធុរកិច្ចលើវិស័យកសិកម្មផងដែរ។ នេះបើតាមការឱ្យដឹងរបស់សភាពាណិជ្ជកម្មកម្ពុជា ពីកិច្ចពិភាក្សារវាងឯកឧត្តមឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា និងទីប្រឹក្សារដ្ឋមន្ត្រីទទួលបន្ទុកអនុប្រធានបេសកកម្ម នៃស្ថានទូតសាធារណរដ្ឋសង្គមនិយមវៀតណាមប្រចាំកម្ពុជា។ 

បើតាមការចុះផ្សាយរបស់សភាពាណិជ្ជកម្មកម្ពុជា កាលពីថ្ងៃទី៤ ខែមីនា ឆ្នាំ២០២៤ កិច្ចពិភាក្សារវាងកម្ពុជា និងវៀតណាម បានធ្វើឡើងក្នុងគោលបំណងពង្រីកកិច្ចសហប្រតិបត្តិការលើវិស័យធុរកិច្ច និងវិនិយោគនានា រវាងធុរជន និងវិនិយោគិនរវាងប្រទេសទាំងពីរ។ ជំនួបពិភាក្សានេះ ក៏បានចែករំលែកព័ត៌មានពាណិជ្ជកម្ម វិនិយោគ និងបរិយាកាសធុរកិច្ចកម្ពុជា-វៀតណាម នាពេលអនាគតផងដែរ។ 

ក្នុងកិច្ចពិភាក្សាដដែល បានឱ្យដឹងថា ក្នុងឆ្នាំ២០២២ ទំហំពាណិជ្ជកម្មកម្ពុជា-វៀតណាម មានចំនួន ១១ ពាន់លានដុល្លារ និង ៨ពាន់លានដុល្លារ ក្នុងឆ្នាំ២០២៣ ខណៈគិតត្រឹម២០២៤ ធុរជន និងវិនិយោគិន វៀតណាមមានចំនួន ៥០ក្រុមហ៊ុន កំពុងប្រតិបត្តិការធុរកិច្ច និងវិនិយោគនៅកម្ពុជា ក្នុងសកម្មភាពធុរកិច្ចលើវិស័យកសិកម្មជាដើម៕