ភ្នំពេញ៖ ប្រទេសកម្ពុជា គាំទ្រប្រទេសឡាវធ្វើជាប្រធានអាស៊ានប្តូរវេន ឆ្នាំ២០២៤។ កម្ពុជា នឹងចូលរួមផ្តល់ថវិកាចំនួន១លានដុល្លារ សម្រាប់រៀបចំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ។ នេះជាការលើកឡើងរបស់សម្តេចធិបតី ហ៊ុន ម៉ាណែត ក្នុងពិធីចុះហត្ថលេខា និងសន្និសីទសារព័ត៌មានជាមួយឯកឧត្តម សនសៃ ស៊ីផាន់ដន នាយករដ្ឋមន្រ្តីប្រទេសឡាវ។

នាឱកាសនោះ សម្ដេចធិបតីនាយករដ្ឋមន្រ្តី បានអរគុណប្រទេសឡាវ ដែលបានជួយផ្គត់ផ្គង់ក្នុងវិស័យថាមពលជាបន្តបន្ទាប់ដល់កម្ពុជា។ សម្តេចធិបតី ហ៊ុន ម៉ាណែត បានបញ្ជាក់ថា កម្ពុជា-ឡាវ ទើបនឹងចុះ MOU លើវិស័យថាមពល ដំណាក់កាលទី២ អមដោយគម្រោងផ្សេងៗ ដូចជា ការរៀបចំកិច្ចប្រជុំលើកទី១៥ នៃគណៈកម្មការរួមសម្រាប់កិច្ចសហប្រតិបត្តិការទ្វេភាគី, ការដាក់ឱ្យដំណើរការឡើងវិញនូវគណៈកម្មាធិការពាណិជ្ជកម្មចម្រុះ JTC ដោយមានវេទិកាធុរកិច្ច និងវិនិយោគ, ការពង្រីកសមាហរណកម្មសេដ្ឋកិច្ច តាមរយៈការផ្លាស់ប្តូរពាណិជ្ជកម្ម និងការជំរុញផ្នែកសេវាកម្ម មាន សេវាហិរញ្ញវត្ថុ សេវាដឹកជញ្ជូនផ្លូវគោក និងទេសចរណ៍ តាមរយៈការបង្កើនការហោះហើរត្រង់កម្ពុជា-ឡាវ។

ដំណើរទស្សនកិច្ចទៅកាន់ប្រទេសឡាវ របស់រាជរដ្ឋាភិបាលកម្ពុជានេះ ដើម្បីពង្រឹងនូវចំណងមិត្តភាព សាមគ្គីភាព និងកិច្ចសហប្រតិបត្តិការឈរលើមូលដ្ឋានភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែង។ នាយករដ្ឋមន្រ្តីឡាវ សនសៃ ស៊ីផាន់ដន បានរំពឹងថា ទស្សនកិច្ចផ្លូវការរបស់សម្តេចធិបតី ហ៊ុន ម៉ាណែត មកកាន់ប្រទេសឡាវនេះ នឹងធ្វើឱ្យកិច្ចសហប្រតិបត្តិការ និងទំនាក់ទំនងទ្វេភាគីកម្ពុជា-ឡាវ កាន់តែរីកចម្រើន និងកាន់តែរឹងមាំ៕