ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកទឹកចិត្តដល់និស្សិតចំនួន ១៩រូប ដែលទៅបន្តការសិក្សានៅប្រទេសហុងគ្រីក្នុងឆ្នាំសិក្សា ២០២៤-២០២៥ ឱ្យចាប់យកជំនាញវិទ្យាសាស្ត្រ និងបច្ចេកវិទ្យា។ ឯកឧត្តម ហែម វណ្ណឌី បានបន្តថា ការចាប់យកជំនាញវិទ្យាសាស្ត្រ និងបច្ចេកវិទ្យា នឹងជំរុញកំណើនឧស្សាហកម្មដែលបង្កើតតម្លៃបន្ថែមខ្ពស់ ដូចជាអ្នកវិទ្យាសាស្ត្រផ្នែកចំណីអាហារ និងបច្ចេកវិទ្យាជីវសាស្រ្ត។

ក្នុងជំនួបជាមួយនិស្សិតចំនួន១៩រូបនេះ រដ្ឋមន្ត្រីក្រសួងឧស្សាហកម្ម បានបន្តថា និស្សិតដែលទៅសិក្សានៅហុងគ្រី គឺជាធនធានសំខាន់របស់ជាតិ ពិសេសបានរួមចំណែកពិសេសក្នុងវិស័យវិទ្យាសាស្ត្រ និងបច្ចេកវិទ្យាសម្រាប់ការអភិវឌ្ឍរបស់កម្ពុជា។ លើសពីនេះ ឯកឧត្តម ហែម វណ្ណឌី ក៏បានលើកទឹកចិត្តដល់និស្សិតទាំងអស់ ឱ្យខិតខំសិក្សា និងប្រើប្រាស់ជំនាញប្រកបដោយក្រមសីលធម៌ ដើម្បីធានាថាវិទ្យាសាស្ត្រ និងបច្ចេកវិទ្យា ត្រូវបានប្រើក្នុងផ្លូវដែលបម្រើជាប្រយោជន៍។

តាមការចុះផ្សាយរបស់ក្រសួងឧស្សាហកម្ម នាថ្ងៃទី២៧ ខែសីហា ឆ្នាំ២០២៤ និស្សិតចំនួន១៩រូប ដែលទទួលបានជ័យលាភីអាហារូបករណ៍ Stipendium Hungaricum នៅប្រទេសហុងគ្រី រួមមាន៖ ថ្នាក់បណ្ឌិត ៣រូប, ថ្នាក់បរិញ្ញាបត្រជាន់ខ្ពស់ ៧រូប, ថ្នាក់បរិញ្ញាបត្រដែលបន្តទៅបរិញ្ញាបត្រជាន់ខ្ពស់ ២រូប និងនិស្សិតថ្នាក់បរិញ្ញាបត្រ ៧រូប៕