ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា(CDC) អនុម័តគម្រោងវិនិយោគបានចំនួន ៤១៤គម្រោងនៅឆ្នាំ២០២៤ មានការកើនឡើង ១៤៦គម្រោង ដែលស្មើនឹង ៥៤% បើធៀបនឹងឆ្នាំ២០២៣ មានចំនួន ២៦៨គម្រោង។ នេះជាលទ្ធផលស្ថិតិគម្រោងវិនិយោគអនុម័តដោយ CDC ដែលបង្ហាញក្នុងកិច្ចប្រជុំផ្លូវការលើកទី១ របស់ក្រុមប្រឹក្សាអភិវឌ្ឍន៍កម្ពុជា ក្រោមកិច្ចដឹកនាំរបស់សម្តេចធិបតី ហ៊ុន ម៉ាណែត ជាប្រធាន CDC។

ក្នុងកិច្ចប្រជុំផ្លូវការលើកទី១ របស់ក្រុមប្រឹក្សាអភិវឌ្ឍន៍កម្ពុជា នាថ្ងៃទី២០ ខែធ្នូ ឆ្នាំ២០២៤ បានឱ្យដឹងថា នៅឆ្នាំ២០២៤ CDC បានទទួលទុនវិនិយោគចំនួន ៦,៩០០លានដុល្លារ កើនឡើងចំនួន ១,៩៧៣ លានដុល្លារ ដែលស្មើនឹង៤០% បើធៀបនឹងឆ្នាំ២០២៣ ដែលមានទំហំវិនិយោគ ៤,៩២៧លានដុល្លារ។

កិច្ចប្រជុំខាងលើនេះ ជាកិច្ចប្រជុំក្រុមប្រឹក្សាអភិវឌ្ឍន៍កម្ពុជាលើកដំបូង បន្ទាប់ពីរាជរដ្ឋាភិបាលនីតិកាលទី៧ ដំណើរការក្នុងនាមជាប្រមុខរាជរដ្ឋាភិបាលផង និងជាប្រធានក្រុមប្រឹក្សាអភិវឌ្ឍន៍កម្ពុជាផង។ គួរបញ្ជាក់ថា ក្រុមប្រឹក្សាអភិវឌ្ឍន៍កម្ពុជា ហៅកាត់ថា ក.អ.ក. ឬ CDC ត្រូវបានបង្កើតឡើងនៅថ្ងៃទី៥ ខែសីហា ឆ្នាំ១៩៩៤ ដែលមានបេសកកម្មក្នុងការទាក់ទាញវិនិយោគមកកម្ពុជា៕