ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកទឹកចិត្តនិស្សិតជ័យលាភីអាហារូបករណ៍ទៅសិក្សានៅប្រទេសជប៉ុនចំនួន ២៩រូប ធ្វើជាទូតសុច្ឆន្ទៈរបស់កម្ពុជា ដើម្បីផ្សព្វផ្សាយពីវឌ្ឍនភាពរបស់ប្រទេស ទៅកាន់ពិភពលោក។ ឯកឧត្តម ហេង សួរ បានបន្ថែមថា ការផ្សព្វផ្សាយពីវប្បធម៌ និងប្រាង្គប្រាសាទអង្គរវត្តរបស់កម្ពុជាដល់បរទេស គឺដើម្បីកៀរគរអ្នកវិនិយោគ និងទេសចរណ៍ឱ្យមកកម្ពុជាកាន់តែច្រើន។

ក្នុងគ្រាជំនួបជាមួយនិស្សិតជ័យលាភីអាហារូបករណ៍ទៅសិក្សានៅជប៉ុន ក្រោមគម្រោងអភិវឌ្ឍន៍ធនធានមនុស្ស (JDS) និងគម្រោងអាហារូបករណ៍រដ្ឋាភិបាលជប៉ុន MEXT នាថ្ងៃទី០៦ ខែសីហា ឆ្នាំ២០២៤នេះ រដ្ឋមន្ត្រីក្រសួងការងារ បានបញ្ជាក់ថា ការផ្សព្វផ្សាយពីចំណុចវិជ្ជមានផ្សេងៗទៀតដែលកម្ពុជាមាន ក៏ជាប្រយោជន៍ដល់សង្គមជាតិ ក្នុងនាមយើងជាបញ្ញវន្តផងដែរ។

បើតាមការចុះផ្សាយរបស់ក្រសួងការងារ ជំនួបដែលធ្វើឡើងនៅទីស្តីការក្រសួងផ្ទាល់ ក្នុងគោលបំណងផ្តល់ឱកាសដល់និស្សិតអាហារូបករណ៍ទាំងនោះ បានជួបជជែកជាមួយឯកឧត្តម ហេង សួរ ដែលធ្លាប់ជាអតីតនិស្សិតទៅសិក្សានៅប្រទេសជប៉ុន ដើម្បីទទួលបាននូវបទពិសោធ ព័ត៌មាន និងប្រសាសន៍ល្អៗ៕