ភ្នំពេញ៖ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានស្នើឱ្យសាជីវកម្មហិរញ្ញវត្ថុអន្តរជាតិ (IFC) ពង្រីកប្រតិបត្តិការនៅកម្ពុជា ទាំងទំហំនិងវិសាលភាពនៃការវិនិយោគលើវិស័យផ្សេងៗក្រៅពីវិស័យធនាគារនិងហិរញ្ញវត្ថុ។ ឯកឧត្តម វង្សី វិស្សុត បានលើកឡើងបែបនេះក្នុងជំនួបជាមួយលោកស្រី Towfiqua Hoque ប្រធានស្ថានតំណាងសាជីវកម្ម IFC ប្រចាំកម្ពុជា។

ក្នុងជំនួបការងារដើម្បីសិក្សាស្វែងយល់ឱ្យកាន់តែស៊ីជម្រៅអំពីឱកាសពង្រីកការវិនិយោគរបស់ IFC នៅកម្ពុជា លោកស្រី Towfiqua Hoque បានបញ្ជាក់ថា នឹងនាំយកនូវសំណើរបស់ឯកឧត្តម វង្សី វិស្សុត ជូនថ្នាក់ដឹកនាំសាជីវកម្ម IFC ដើម្បីពិនិត្យលទ្ធភាពពង្រីកប្រតិបត្តិការបន្ថែមទៀតនៅកម្ពុជា ជាពិសេសក្នុងវិស័យពាណិជ្ជកម្ម វិនិយោគ ហិរញ្ញវត្ថុ កសិកម្ម កសិ-ពាណិជ្ជកម្ម ឧស្សាហកម្ម ថាមពល ហេដ្ឋារចនាសម្ព័ន្ធ ឡូជីស្ទីក និងការដឹកជញ្ជូន។

ឯកឧត្តម វង្សី វិស្សុត ក៏បានលើកឡើងពីកត្តាចាំបាច់នៃការបន្តពង្រឹងភាពជាដៃគូ និងកិច្ចសហប្រតិបត្តិការរវាង IFC ជាមួយប្រទេសកម្ពុជាតាមរយៈការធ្វើពាណិជ្ជកម្ម។ បន្ថែមលើនេះ ឯកឧត្តមឧបនាយករដ្ឋមន្ត្រីប្រចាំការ ក៏បានលើកឡើងអំពីវឌ្ឍនភាពថ្មីៗពាក់ព័ន្ធនឹងដំណើរការនៃការអភិវឌ្ឍរបស់ប្រទេសកម្ពុជា បញ្ហាប្រឈម និងកាលានុវត្តភាពនានាផងដែរ៕