ភ្នំពេញ៖ រាជរដ្ឋាភិបាល បានប្រកាសឱ្យមន្ត្រីរាជការ បុគ្គលិក កម្មករ និយោជិត និងសិស្សនិស្សិតទាំងអស់ ឈប់សម្រាកនៅថ្ងៃទី៥ ខែសីហា ឆ្នាំ២០២៤ ដើម្បីចូលរួមអបអរសាទរការបើកការដា្ឋនសាងសង់ ព្រែកជីកហ្វូណនតេជោ ដែលជាគម្រោងផ្តល់ផលប្រយោជន៍ដល់សង្គម-សេដ្ឋកិច្ចកម្ពុជា។

តាមរយៈសារាចរ ដែលចេញផ្សាយដោយសម្តេចធិបតី ហ៊ុន ម៉ាណែត នាថ្ងៃទី០១ សីហា ការបើកការដ្ឋានសាងសង់នេះ គឺជាព្រឹត្តិការណ៍ប្រវត្តិសាស្ត្ររបស់កម្ពុជា ក្នុងស្មារតី «គម្រោងរបស់ខ្មែរទាំងអស់គ្នា ដោយខ្មែរ និងដើម្បីខ្មែរគ្រប់រូប»។ មន្ត្រីរាជការ បុគ្គលិក កម្មករ និយោជិត និងសិស្សនិស្សិត ត្រូវបានឈប់សម្រាកនៅថ្ងៃទី០៥ សីហានេះ បន្ទាប់ពីចូលរួមអបអរសាទរការបើកការដ្ឋានសាងសង់ ព្រែកជីកហ្វូណនតេជោជាផ្លូវការ នៅតាមក្រសួង ស្ថាប័ន អង្គភាព គ្រឹះស្ថានសាធារណៈនិងឯកជន រោងចក្រ និងសហគ្រាសនីមួយៗ។

ជាមួយគ្នានេះ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ត្រូវធ្វើសេចក្តីណែនាំដល់ រោងចក្រ សហគ្រាស គ្រឹះស្ថាន អំពីការឈប់សម្រាក និងត្រូវមានប្រាក់ឈ្នួល ដល់បុគ្គលិក កម្មករ និងនិយោជិត ដែលស្ថិតនៅក្រោមច្បាប់ស្តីពីការងារនិងលិខិតបទដ្ឋានគតិយុត្តជាធរមាន។ ចំពោះ រដ្ឋមន្ត្រីក្រសួងអប់រំ យុវជន និងកីឡា ត្រូវធ្វើសេចក្តីណែនាំដល់គ្រប់គ្រឹះស្ថានអប់រំសាធារណៈ និងឯកជន អំពីការឈប់សម្រាកនេះផងដែរ៕